Bjarni hellir sér yfir Semu

Bjarni Benediktsson, utanríkisráðherra og formaður Sjálfstæðisflokksins, tjáir sig í færslu á Facebook. Færsluna skrifar hann í tilefni af ummælum Semu Erlu um hann, sem komu bæði fram í yfirlýsingu Solaris og í hádegisfréttum Ríkisútvarpsins um helgina.

Hann segir að um þessar mundir sé mikil skautun þjóðmálaumræðu orðin vaxandi áhyggjuefni víða í Evrópu og Bandaríkjunum. Sú þróun hafi ítrekað orðið að umræðuefni á fundum hans með utanríkisráðherrum vina- og samstarfsþjóða. 

„Nú er svo komið að ég tel að við þurfum að hafa raunverulegar áhyggjur af þessu sama á Íslandi.“

Fólki frjálst að hafa aðrar skoðanir

Fyrir helgi hafi hann gagnrýnt ákvörðun Reykjavíkurborgar um að láta það viðgangast svo vikum skipti að fólk dveldist dag og nótt í tjöldum á Austurvelli. Hann sé þeirrar skoðunar að það sé algjörlega óásættanlegt að mótmælendur tjaldi og gisti á Austurvelli um lengri tíma. Honum heyrist að borgarstjóri sé loks kominn á þá skoðun einnig. Hann sé sömuleiðis alfarið á móti því að erlendir þjóðfánar blakti fyrir framan þjóðþingið daga og nætur vikum saman.

„Fólki er frjálst að hafa á þessu aðrar skoðanir. Og sannarlega getur fólk einnig verið ósammála mér um að hælisleitendakerfi okkar sé komið í mikinn vanda, bæði hvað varðar kostnað og innviði samfélagsins. En það er í mínum huga algjört þrot lýðræðislegrar umræðu þegar sagt er að þessi sjónarmið sýni skort á samúð og skilningi á aðstæðum fólks í viðkvæmri stöðu. Ég hef þvert á móti ítrekað lýst samúð okkar og skilningi á stöðu fólks sem lifir í ótta um afdrif ættingja sinna á fjarlægum slóðum. Ísland hefur beitt sér af krafti alls staðar sem því er við komið og við höfum ekki látið okkar eftir liggja í mótttöku og stuðningi við fólk frá Gaza - þvert á móti.“

Ágætt dæmi um skautun umræðunnar

Bjarni segir að þeir sem lengst gengu í gagnrýni á ummæli hans hafi sagt þau hreina útlendingaandúð, og vísar í orð Semu Erlu og fleiri.

„Hér erum við komin með ágætt dæmi um skautun í opinberri umræðu þar sem ábendingar um augljósa galla í hælisleitendakerfinu leiða til ásakana um skort á allri samkennd, rasisma og hvatningu til ofbeldis.“

Það fjölgi hratt í hópi fólks sem segir við hann að orðfærið sem nú tíðkast sé orðið svo grimmilegt að það veigri sér við að opinbera skoðanir sínar á hinum ýmsu málum. Ekki síst eigi þetta við á samfélagsmiðlum. Það sé við slíkar aðstæður sem hætt er við að upp úr sjóði og raunverulegar öfgar, sem við höfum blessunarlega verið að mestu laus við á Íslandi, geri vart við sig.

Skoðanaskipti verði að geta átt sér stað

Bjarni segir að í lýðræðisríki eigi skoðanaskipti að geta átt sér stað. Allir sem vilji leggja sitt af mörkum til að bæta samfélagið ættu að vera sammála um mikilvægi heilbrigðra skoðanaskipta þótt orðaskipti megi vel vera hvöss. 

Ásakanir aðjúnkts í Háskóla Íslands um að hann hefði mögulega gerst brotlegur við almenn hegningarlög, með því að segja skoðun sína á stöðu mála á Austurvelli og almennt í hælisleitendamálum séu fráleitar og dæmi sig sjálfar.

„Þessar skoðanir mínar hafa ekkert með réttinn til að mótmæla og veita stjórnvöldum aðhald að gera. Það eru grundvallarréttindi og snar þáttur í framkvæmd lýðræðisins. Þann rétt mun ég ávallt verja.“

Skemmdarverk unnin á ráðuneytinu í morgun

„En eins og flest önnur réttindi eiga þau sér takmörk. Ég legg áherslu á að fólk haldi sig innan ramma laganna. Að sletta málningu á opinberar byggingar er til dæmis skýrt lögbrot,“ segir Bjarni og tilkynnir að í morgun hafi þurft að afmá ummerki skemmdarverka á utanríkisráðuneytinu. 

Tveir hettuklæddir menn hafi mætt þangað snemma morguns og slett rauðri málningu á bygginguna. Hreinsun sé lokið og málið til meðferðar hjá lögreglu. 

„Svona framkoma er ólíðandi og á ekkert skylt við þau sjálfsögðu réttindi í lýðræðisríki að fólk komi saman og mótmæli, eins og nú er boðað að gerist klukkan 15 fyrir framan þinghúsið.“

Færslu Bjarna má sjá í heild sinni hér að neðan: