Arsenal enn tap­lausir eftir endur­komu­jafn­tefli

Arsenal björguðu stigi með frábærri endurkomu á Stamford Bridge í dag en Chelsea komust í 2-0 í upphafi síðari hálfleiks.

Cole Palmer kom Chelsea yfir með marki úr vítaspyrnu sem var dæmt með aðstoð VAR þar sem boltinn fór greinilega í hönd varnarmanns en af stuttu færi. Slík atvik hafa ekki alltaf gefið víti í vetur en hendin var augljós og víti dæmt.

Hálfleiksræðan hjá Mikel Arteta skilaði sér greinilega ekki strax en Arsenal menn virtust vera sofandi í upphafi hálfleiks þar sem þeir misstu boltann klaufalega á miðjum vellinum og Mykhaylo Mudryk skoraði í kjölfarið glæsilegt mark sem átti þó mögulega að vera fyrirgjöf.

Arsenal menn náðu þó smám saman að vinna sig aftur inn í leikinn en Robert Sanchez, markvörður Chelsea, færði Declan Rice galopið færi á silfurfati þegar hann sendi boltann beint í fætur hans og Rice þakkaði fyrir sig með því að skora í tómt markið.

Leandro Trossard bjargaði svo stiginu þegar hann afgreiddi frábæra fyrirgjöf frá Saka í markið á fjærstönginni. Arsenal því áfram taplausir og fara upp að hlið Manchester City en bæði lið eru með 21 stig eftir níu leiki.