Innlent

Engar hvalveiðar í sumar

Árni Sæberg skrifar
Engar ferskar langreyðar verða skornar í Hvalfirði í sumar.
Engar ferskar langreyðar verða skornar í Hvalfirði í sumar. Stöð 2/Egill

Svandís Svavarsdóttir matvælaráðherra hefur ákveðið að stöðva veiðar á langreyðum í sumar. Til stóð að hefja hvalveiðar á morgun en nú er ljóst að það verður ekki gert fyrr en 1. september, í fyrsta lagi. „Nú er spurningin sú hvort þessi atvinnugrein eigi sér yfir höfuð framtíð,“ segir hún.

Eftirlitsskýrsla Matvælastofnunar um velferð hvala við veiðar á langreyðum barst ráðuneytinu í maí 2023 en niðurstaða skýrslunnar er að aflífun dýranna hafi tekið of langan tíma út frá meginmarkmiðum laga um velferð dýra, að því er segir í tilkynningu á vef Stjórnarráðsins.

Þar segir að Matvælastofnun hafi falið fagráði um velferð dýra að meta hvort veiðarnar geti yfirhöfuð uppfyllt markmið laga um velferð dýra. Álit fagráðsins barst matvælaráðuneytinu 19. júní og niðurstaða þess er að sú veiðiaðferð sem beitt er við veiðar á stórhvelum samræmist ekki lögum um velferð dýra.

Í ljósi þeirrar niðurstöðu sé nauðsynlegt að fresta upphafi hvalveiðivertíðarinnar þannig að ráðrúm gefist til þess að kanna hvort unnt sé að tryggja að veiðarnar fari fram í samræmi við ákvæði laga um velferð dýra.

„Ég hef tekið ákvörðun um að stöðva hvalveiðar tímabundið í ljósi afdráttarlauss álits fagráðs um velferð dýra,” sagði matvælaráðherra. „Skilyrði laga um velferð dýra eru ófrávíkjanleg í mínum huga, geti stjórnvöld og leyfishafar ekki tryggt kröfur um velferð á þessi starfsemi sér ekki framtíð,“ er haft eftir Svandísi.

Ráðuneytið muni kanna mögulegar úrbætur og lagaleg skilyrði þess að setja frekari takmarkanir á veiðarnar á grundvelli laga um velferð dýra og laga um hvalveiðar á komandi mánuðum og leita álits sérfræðinga og leyfishafa í því skyni.

„Þetta er mín ákvörðun“

Svandís Svavarsdóttir ræddi ákvörðunina í beinni útsendingu í hádegisfréttum Bylgjunnar fyrir skömmu. Hún segir að ákvörðunin hafi verið kynnt á ríkisstjórnarfundi í morgun en það hafi aðeins verið til upplýsingar, ekki atkvæðagreiðslu.

„Það liggur alveg fyrir að þetta er mín ákvörðun, og hún er tekin á grundvelli bestu mögulegu upplýsinga og þess lagaumhverfis sem liggur fyrir,“ segir hún.

Spurð út í framhaldið segir Svandís að það komi allt til greina. „Nú er spurningin sú hvort þessi atvinnugrein eigi sér yfir höfuð framtíð. Það er spurningin sem hlýtur að vera sú mest aðkallandi. Við munum ráðfæra okkur við sérfræðinga og væntanlega leyfishafa í því skyni að kanna hver staðan er og hvort þessi atvinnugrein eigi yfirleitt framtíð fyrir sér.“

Fréttin hefur verið uppfærð.

Hvalveiðar

Tengdar fréttir

Al­þjóð­leg sam­tök skora á ráð­herra að stoppa bátana

Dýraverndunarsamtökin Hard to Port og Whale and Dolphin Conservation hafa sent frá sér fréttatilkynningu þar sem þau kalla eftir því að stjórnvöld á Íslandi afturkalli heimild Hvals hf. til hvalveiða og komi í veg fyrir að bátar fyrirtækisins leggi úr höfn á morgun.

Paul Watson segir hvalveiðar Íslendinga stjórnast af þráhyggju eins manns

Paul Watson fyrrverandi leiðtogi Sea Shepard samtakanna sem sökktu tveimur hvalbátum í Reykjavíkurhöfn árið 1986 nálgast Íslandsmið til að trufla veiðar Hvals hf. í sumar. Hópur fólks úr Hvalavinum koma saman til mótmæla við hvalbátana seinni partinn í dag en nú er verið að undirbúa þá til veiða.

Fagráð um vel­ferð dýra segir hval­veiðar ekki sam­ræmast lögum

Fagráð um velferð dýra hefur komist að þeirri niðurstöðu að sú veiðiaðferð sem beitt er við veiðar á stórhvelum samræmist ekki ákvæðum laga nr. 55/2013 um velferð dýra. Ekki sé hægt að uppfylla þau skilyrði sem nauðsynleg eru til að tryggja velferð dýra við aflífun.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið