Gervi­greind á jólaísnum hafi komið á ó­vart

Hér fyrir ofan má sjá jólaauglýsingu Coca-Cola í ár. Auglýsingin þykir umdeild vegna notkunar gervigreindar til að endurgera fræga auglýsingu fyrirtækisins frá 1995. Það hefur verið gagnrýnt af ýmsum sem vilja meina auglýsinguna bera þess merki að vera sálarlaus og skorta frumleika.

Svo virðist sem stórfyrirtæki prófi sig áfram í auknum mæli við að nýta gervigreindina í markaðsefni fyrir ýmis konar vörur.

Þróunin er þó ekki aðeins bundin við fyrirtæki fyrir utan landsteinana en sem dæmi skjóta reglulega upp kollinum íslenskar auglýsingar sem virðast vera gerðar með gervigreind.

Til dæmis hefur bókaútgáfan Óðinsauga nýtt tækninýjungina til að myndskreyta barnabækur. Þetta og fleiri dæmi má sjá í spilaranum hér að neðan.

Þá hafa orðið miklar umræður í kringum pakkningar jólaíss frá Kjörís en þar er gervigreind notuð til að myndskreyta pakkningar sem hefur lagst misvel í fólk.

Samkvæmt hönnunarstofunni á bak við skreytinguna var þessi leið farin þar sem skammur tími var til stefnu. Markaðsdeild Kjöríss var meðvituð um gervigreindarnotkun.

Anton Jónas Illugason, formaður Félags íslenskra teiknara, segist hafa orðið var við þó nokkra gervigreindar markaðsetningu undanfarið. Það komi á óvart að Kjörís fari þá leið.

„Þetta endurspeglar einhvern veginn hvernig fyrirtæki koma fram og Kjörís slær mann sem fjölskyldufyrirtæki af landsbyggðinni og hefur verið með mikla natni í sínu markaðsstarfi. Manni finnst skrítið að sjá þau fara í svona ódýran kost sem er gervigreind. Sérstaklega fyrir jólatíðina sem er mjög tengd tilfinningum.“

Hann segir þó dæmi um að gervigreindin sé nýtt sem tól með góðum árangri.

„En það sem maður virðist vera að sjá í sumum tilfellum er bara að treysta tólinu í blindni og bara stimpla eitthvað inn og treysta því sem hinni endanlegu afurð.“

Hann segir listamenn ekki þurfa að hafa of miklar áhyggjur að gervigreindin skipti þeim út og bendir á að ódýrari leiðir hafi áhrif á ímynd vöru og vörumerkis.

„Ég held að neytendur hafi ekki mikinn húmor fyrir því að þau séu að spara svona mikið í sínu starfi við að tala við neytendur. Þá taparðu rosa mikilli viðskiptavild frá fólki. Þetta er smá svona: Þú ert að hreyta einhverju ódýru í mig en ég á að vera tryggur við þig sem neytandi.“