„Ég vakna á hverjum einasta morgni og hugsa hvað í ósköpunum gerðist, vá hvað ég þakklátur,“ segir Villi einlægur í samtali við blaðamann um ástina og lífið.
„Það fallegasta sem ég hef kynnst í lífinu er ástin. Ég sem hélt svo lengi að ég þyrfti hana ekki, væri betur settur án hennar, almáttugur hvað ég var á villigötum.“
Villi og Niclas kynntust í Malmö í Svíþjóð í desember í fyrra þegar Villi var í heimsókn hjá vinkonu sinni.
„Ég var að heimsækja vinkonu mína fyrir jólin í Malmö og hún og sonur hennar spurðu hvort ég þyrfti ekki að skoða Tinder erlendis, sem ég hafði ekki gert áður. Ég fór inn og þar var hann,“ segir Villi sem fann strax að hann þyrfti að kynnast Niclas.
Eins og í rómantískri bíómynd
„Þegar ég hitti hann svo í fyrsta í skiptið hugaði ég þarna er hann, þarna er hann mættur. Ég þyrfti bara að leita erlendis," segir Villi sem lýsir þeim sem mjög ólíkum týpum.
„Það sem heillaði mig við hann er hvað hann er yndislegur, ljúfur, rólegur og góður. Svo skemmir ekki fyrir hvað hann er sætur."
„Á fyrsta date-inu ákváðum við að fara saman út að borða. Ég hugsaði að það yrðu bara tveir klukkutímar en við vorum svo að í marga tíma og við tengdum strax. Það þyrfti ekki að vera neinn leikur eða látalæti," segir Villi og heldur áfram:
„Við kysstumst svo í jólasnjónum umkringdir jólaljósum, þetta var eins og í rómantískri bíómynd."
Orðinn sáttur að vera einn í kósí
Að sögn Villa hafði hann gefið ástina upp á bátinn eftir að hafa upplifað misgóða hluti í stefnumótaheiminum. Honum leið vel einum og var sá framtíðina fyrir sér að vera einn í kósí, eins og hann orðar það.
„Ef einhver myndi koma inn í líf mitt þyrfti hann að vera rosa sérstakur,“ segir Villi og lýsir því hvernig Niclas snéri lífi hans á hvolf.
„Svo kemur hann og tekur mig út úr kassanum mínum og lífið fer allt í einu á hvolf, þó á mjög skemmtilegan hátt. Það er ótrúlega sérstök tilfinning að geta ekki ímyndað mér framtíðina allt í einu án hans. Heimurinn opnast allt í einu fyrir manni,“ segir Villi einlægur.
Villi fékk oft á tíðum að heyra gamla tugga frá vinum og vandamönnum um að ástin banki upp á þegar maður síst á von á henni.
„Ég hugsaði að fólk vissi ekki hvað það væri að tala um,“ segir hann og hlær, og játar að það eigi sannarlega við í hans tilfelli.
Þetta er ótrúlega sérstök tilfinning að geta ekki ímyndað mér framtíðina án hans
Stefnan sett á Ísland
Villi og Niclas búa enn hvor í sínu landinu en stefna að því að vera meira saman á Íslandi.
„Ég er alltaf að fljúga sem kemur sér akkúrat vel í þessum aðstæðum. Við erum að setja upp næstu mánuði og ár og erum búnir að skoða það að hann komi heim að vinna eina í viku í mánuði,“ segir Villi.
Niclas rekur og starfar á vinsælli botox- og fegrunarstofu í Malmö og skoðar möguleikana í þeim geira á Íslandi.
Afmælisferð í júlí
Spurður hvernig sumarið verði hjá þeim segir Villi að þeir séu að fara í rómantíska helgarferð til Parísar. Þess á milli verði þeir á flakki milli Íslands og Svíþjóðar.
„Svo á ég afmæli í júlí. Hann er að plana óvissuferð,“ segir Villi spenntur fyrir komandi tímum.
