Ömur­legt gengi Chelsea ætlar engan endi að taka

Graham Potter hefur ekki átt sjö dagana sæla sem þjálfari Chelsea og ömurlegt gengi liðsins undir hans stjórn hélt áfram í dag þegar fallkandídatar Southampton unnu 1-0 útisigur á Brúnni.

Chelsea gerði þrjú jafntefli í röð í ensku úrvalsdeildinni áður en liðið tapaði 1-0 fyrir Borussia Dortmund í Meistaradeild Evrópu í vikunni. Southampton, sem rak nýverið Nathan Jones, mætti á Brúnna í dag en fallið blasir einfaldlega við Dýrlingunum sem hafa ekkert getað á leiktíðinni.

Það voru hins vegar gestirnir sem tóku forystuna í blálok fyrri hálfleik þegar James Ward-Prowse þrumaði boltanum í netið beint úr aukaspyrnu. Staðan 0-1 í hálfleik og þrátt fyrir að Chelsea hafi gert sex skiptingar í síðari hálfleik þá dugði það einfaldlega ekki. Lokatölur 0-1 og ömurlegt gengi Chelsea heldur áfram.

Chelsea er eftir tap dagsins í 10. sæti deildarinnar með 31 stig á meðan Southampton er áfram í botnsæti deildarinnar með 18 stig.

Önnur úrslit

Brentford 1-1 Crystal Palace

Brighton & Hove Albion 0-1 Fulham

Everton 1-0 Leeds United

Wolves 0-1 Bournemouth