Veður

„Seinasta sem við viljum er að vera úlfur, úlfur týpan“

Árni Sæberg skrifar
Mikilvægt er að huga að öryggi barna á leið til skóla í fyrramálið.
Mikilvægt er að huga að öryggi barna á leið til skóla í fyrramálið. Vísir/Vilhelm

Von er á vonskuveðri og almannavarnir hafa lýst yfir óvissustigi á landinu öllu í fyrramálið. Appelsínugular viðvaranir verða í gildi alls staðar nema á Vestfjörðum í fyrramálið. Fólk er hvatt til þess að fylgjast vel með og reyna eftir fremsta megni að fresta ferðum sínum á meðan veðrið gengur yfir.

Í tilkynningu almannavarna vegna slæmrar veðurspár segir að ríkislögreglustjóri hafi ákveðið í samráði við alla lögreglustjóra landsins að lýsa yfir óvissustigi.

„Fyrsta appelsínugula viðvörun Veðurstofunnar tekur gildi kl. 6:00 í fyrramálið. Góðu fréttirnar eru að veðrið fer hratt yfir og síðasta appelsínugula viðvörunin rennur úr gildi um hádegisbilið. Almannavarnir biðla til almennings um að ganga frá lausamunum til að fyrirbyggja foktjón. Einnig er mikilvægt að byggingarfyrirtæki hugi að sínum svæðum og geri viðeigandi ráðstafanir til að koma í veg fyrir og draga úr tjóni. Miklar líkur eru á að veðrið muni hafa áhrif á samgöngur og eru vegfarendur beðnir um að vera ekki á ferðinni að óþörfu á þeim svæðum þar sem veðrið er verst hverju sinni. Fólki bent á að sýna varkárni og fylgjast með veðurspám,“ segir í tilkynningu. Hægt er að fylgjast með veðrinu á vef Veðurstofunnar.

Vilja alls ekki kalla „úlfur, úlfur“

Hjördís Guðmundsdóttir, samskiptastjóri almannavarna, segir í samtali við Vísi að óvissustigi sé ekki lýst yfir að ástæðulausu. Það veður sem spáð er að gangi yfir landið á morgun geti hæglega ollið miklu foktjóni auk þess að hafa áhrif á samgöngur.

„Seinasta sem við viljum er að vera úlfur, úlfur týpan,“ segir hún.

Þá sé erfitt að spá fyrir um það hvar og hvenær veðrið verði verst og því sérstaklega mikilvægt að fólk haldi sér vel upplýstu um aðstæður hverju sinni.

„Kannski upplifir fólk að við séum alltaf að segja það sama og appelsínugul viðvörun og önnur appelsínugul viðvörun geta verið mismunandi. En eins og við lesum út úr þessu þá gæti verið að þessi appelsínugula viðvörun geti haft mikil áhrif. Við erum alltaf að tala um samgöngurnar, sem skipta auðvitað gríðarlegu máli, en rokið getur haft þessar afleiðingar sem geta skipt fólk máli. Við höfum enn meiri áhyggjur af því,“ segir hún.

Foreldrar þurfi að meta stöðuna sjálfir

Í tilkynningu frá skóla- og frístundarsviði Reykjavíkurborgar til forráðamanna skólabarna segir að þeir þurfi að morgni að tryggja að starfsmaður taki á móti börnunum þegar komið er í skólann þar sem einhver röskun geti orðið á skólastarfi vegna veðurs. Tafist geti að fullmanna skólann og mega forsjáraðilar þá búast við að starfsfólk leiti liðsinnis þeirra. Forsjáraðilar séu hvattir til að taka slíkum óskum vel.

Helgi Grímsson, sviðstjóri sviðsins, segir í samtali við Vísi að forráðamenn verði að meta það sjálfir hvernig örugg för barna í skólann verði tryggð. Erfitt sé að gefa út algildar leiðbeiningar enda sé mismunandi hvar og hvenær veðrið kemur verst niður.

„Foreldrar þurfa að fylgjast mjög vel með og meta aðstæður í sínu skólahverfi,“ segir hann.

Þá sé mikilvægt að foreldrar láti skólann vita ef þeir meta það svo að börn þeirra komist ekki í skólann eða för þeirra seinki.

„Ugglaust munu einhverjir bíða eftir að veðrinu sloti og fara ekki í vinnuna eða annað slíkt, ef menn eiga kost á því að tefja eilítið ferðina á meðan veðrið gengur yfir. Það er ákveðin skynsemi í því,“ segir hann.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×