Tónlist

„Hefði hlegið að mér og sagt að mig væri að dreyma of stórt“

Dóra Júlía Agnarsdóttir skrifar
Kolbrún Ólafsdóttir notast við listamannsnafnið KUSK.
Kolbrún Ólafsdóttir notast við listamannsnafnið KUSK. Aðsend

Hin 19 ára gamla Kolbrún Óskarsdóttir, jafnan þekkt sem KUSK, hefur átt öflugt tónlistarár. Hún sigraði Músíktilraunir í mars síðastliðnum og hefur komið fram á tónleikum víða um landið síðan þá. KUSK var að senda frá sér lagið UNDAN BERUM HIMNI, sem er jafnframt fyrsti síngúll af væntanlegri plötu.

Platan kemur út nú í haust, ber nafnið SKVALDUR og er fyrsta platan sem söngkonan sendir frá sér. Blaðamaður tók púlsinn á Kolbrúnu og fékk að heyra nánar um lagið, sem hún lýsir sem poppuðu gítarlag, fyllt með draumkenndum synthum og laglínum. UNDAN BERUM HIMNI var samið í svefnherbergi tónlistarkonunnar á sínum tíma en rataði svo með henni í Músíktilraunir í mars. Lagið hefur síðan þá verið í þróun og spilað á hinum ýmsu tónleikum.

KUSK hefur verið í tónlist í rúmt ár þar sem hún hefur prófað sig áfram í lagasmíðum og pródúseringu. Eftir sigurinn á Músíktilraunum 2022 hefur hún haldið áfram að koma fram og þá oftast með besta vini sínum og samstarfsmanni Óvita.

Spilað út fyrir landsteinana

„Þegar sumarið tók við af menntaskóla hafði ég ekki hugmynd um hvert tónlistin myndi taka mig. Ég er búin að fá svo ótrúlega mörg frábær tækifæri til þess að koma fram og unna tónlistinni. Til dæmis höfum við Óviti fengið að spila í Hljómskálagarðinum á 17. júní, á Innipúkanum um Verslunarmannahelgina og höfum jafnvel náð til útlanda þar sem við spiluðum á Westerpop í Hollandi í byrjun júlí,“ segir Kolbrún og bætir við: „Ég er svo ótrúlega þakklát fyrir að hafa fengið að fara út úr þægindarammanum eins mikið og ég hef gert þetta sumar og er svo sannarlega tilbúin í að fara gefa út alla þessa tónlist.“

Draumur að rætast

Rúsínan í pylsuendanum verður morgundagurinn að sögn Kolbrúnar.

„Einn stærsti draumurinn er þó eftir því á morgun fáum við Óviti að koma fram á Tónaflóði Rásar 2 á Arnarhóli á Menningarnótt. 

Ef ég hefði getað sagt sjálfri mér á síðustu Menningarnótt 2019 að ég myndi standa á sviði þar sem mínar stærstu fyrirmyndir stóðu þá aðeins þrem árum seinna hefði ég hlegið að mér og sagt að mig væri að dreyma of stórt,“ 

segir Kolbrún að lokum.

Lagið er mixað af Kára Hrafn Guðmundssyni og masterað af Starra Snæ Valdimarssyni.


Tengdar fréttir

„Langar að koma lífinu öllu af stað og sjá hvar við endum“

Söngkonan Kolbrún Óskarsdóttir er 18 ára gömul og lýsir sér sem miðbæjarrottu úr Reykjavík. Þessi unga söngkona gengur undir listamannsnafninu KUSK og sendi frá sér sitt fyrsta lag í dag. Lagið heitir Flugvélar og er unnið með dúóinu Óviti, sem Hrannar Máni og Snorri Beck skipa.






Fleiri fréttir

Sjá meira


×