„Langar að koma lífinu öllu af stað og sjá hvar við endum“

Hér má heyra lagið af Spotify:

Kolbrún byrjaði að semja tónlist í miðri Covid bylgju en hún uppgötvaði ástríðu sína fyrir því að pródúsera og semja tónlist í gegnum forritið Garageband. Lagið Flugvélar er bjart retró popp lag og mun Kolbrún frumflytja lagið live á gjörningahátíð sem fer fram í Hafnarhúsi Listasafns Reykjavík 12. mars næstkomandi. Blaðamaður heyrði í þessari upprennandi tónlistarkonu og fékk að heyra meira um þetta glænýja lag.

Hætta að eltast við eitthvað sem er ekki til

„Mig langaði svolítið að segja sjálfri mér að hætta að eltast við eitthvað sem er ekki til, hvort sem það eru væntingar, hugsanir eða atburðir,„ segir Kolbrún og bætir við: „Þetta eru svo sannarlega búnir að vera krefjandi tímar síðustu ár, fullir af hlutum og atburðum sem maður gat einhvern veginn ekki stjórnað. Manni er búið að líða eins og maður hafi engin völd og orðinn þreyttur á því.

Þess vegna segi ég í laginu að mig langi, og líklega mun fleiri þessa dagana, dálítið bara að koma lífinu öllu af stað og sjá hvar við endum.“

Fékk góða tilfinningu fyrir beat-inu

Lagið var samið á einni góðri stúdíó helgi en Hrannar Máni pródúseraði.

„Þetta byrjaði í raun allt með því að ég skrapp á klósettið í stúdíóinu og þegar ég kom til baka var Hrannar búin að búa til mjög skemmtilegt beat. Þetta var öðruvísi en lögin sem við höfðum gert áður en ég fékk samt svo góða tilfinningu fyrir því. Þegar ég fór svo að reyna semja yfir það var ekki aftur snúið. 

Textinn og laglínurnar bara ullu úr mér og sjálft lagið var í raun samið á einni helgi.“

Eftir að lagið var klárt tók við langur endurvinnslu tími þar sem Snorri Beck mixaði og masteraði.

„Þar hófst langt tímabil þar sem við endurskoðuðum alls konar hluti í laginu, bættum við og tókum út. Ég var svo sannarlega heppin að fá að vera með í mixinu og fá innsýn í það hvernig allt virkar. Svo þegar við vorum búin að sofa á sama masternum nokkra daga í röð ákváðum við að henda því í útgáfu, og hér erum við í dag.“

Stúdentspróf og meiri músík

Það eru spennandi tímar framundan hjá tónlistarkonunni KUSK en Kolbrún segist án efa stefna á að gefa út fleiri lög á næstunni.

„Eins og staðan er núna er ég að útskrifast úr menntaskóla í vor og ég hlakka svo sannarlega til þess að geta eytt meiri tíma í tónlistina. Það er ótrúlega gaman að fá að vinna með Hrannari og Snorra og ég vonast virkilega til að geta haldið því áfram. 

Einnig stefni ég á það að koma fram á einn eða annan hátt og spila, leyfa fólkinu að heyra þessa ljúfu tóna live. 

Svo er aldrei að vita nema maður ákveði að taka þátt í einhvers konar viðburðum eins og Músíktilraunum eða slíkt,“ segir Kolbrún að lokum.