Tap hjá Jóni Degi fyrir Alderweireld og félögum

Bæði lið voru með fullt hús, sex stig, eftir fyrstu tvo leikina og því ljóst að fullkomin byrjun annars eða beggja liða þyrfti að enda í dag.

Jón Dagur byrjaði leikinn í vinstri vængbakverði í 5-4-1 kerfi Leuven en honum var skipt af velli á 58. mínútu leiksins, aðeins þremur mínútum eftir mark hans manna.

Leuven hafði komist yfir á 27. mínútu en mörk frá fyrrum belgíska landsliðsmanninum Radja Nainggolan og Michael Frey þýddi að staðan var 2-1 fyrir heimamenn í Antwerp í hléi.

Louis Patris jafnaði fyrir Leuven, líkt og áður segir, á 53. mínútu en Leuven gerði tvöfalda skiptingu skömmu síðar þar sem Jóni Degi var skipt af velli. Sú skipting skilaði hins vegar litlum árangri þar sem Michel-Ange Balikwisha skoraði tvö mörk fyrir Antwerp áður en yfir lauk.

Antwerp er því með fullt hús, níu stig, eftir þrjá leiki en liðið ætlar sér stóra hluti á komandi leiktíð. Nainggolan, sem var lengi vel á meðal bestu miðjumanna ítalska boltans, er þar ásamt fyrrum belgísku landsliðsmönnunum Ritchie De Laet og Toby Alderweireld.