Enski boltinn

Spáir því að Man. United endi ofar í töflunni en Liverpool

Óskar Ófeigur Jónsson skrifar
Cristiano Ronaldo fagnar marki fyrir Manchester United á móti Chelsea á síðasta tímabili.
Cristiano Ronaldo fagnar marki fyrir Manchester United á móti Chelsea á síðasta tímabili. EPA-EFE/PETER POWELL

Enska úrvalsdeildin hefst á ný á morgun þegar Crystal Palace fær Arsenal í heimsókn en hin liðin í deildinni hefja síðan leik á laugardag og sunnudag.

Breska ríkisútvarpið, BBC, fékk sérfræðinga sína, til að spá fyrir um fjögur efstu sætin á komandi tímabili.

Það þarf ekki að koma mikið á óvart að Englandsmeistarar Manchester City og bikarmeistarar Liverpool koma þar mjög vel út.

Alls spá þrettán spekingar því að Manchester City vinni titilinn þriðja árið í röð en níu eru á því að Liverpool verði enskur meistari. Ekkert annað lið kemst í efsta sætið í spánni.

Það sem vekur kannski mesta athygli er sá eini sem er ekki með bæði Manchester City og Liverpool í efstu tveimur sætunum.

Hér má sjá hvernig séfræðingar BBC spá fyrir um lokastöðuna.BBC

Sá heitir Robert Green og er fyrrum markvörður enska landsliðsins og fyrrum leikmaður Norwich City, West Ham United, Queens Park Rangers og Leeds United.

Green spáir Manchester City vissulega meistaratitlinum en hann spáir síðan að Manchester United endi ofar en Liverpool.

BBC tók síðan saman hjá öllum 22 sérfræðingunum þar sem gefin voru fjögur stig fyrir fyrsta sæti, þrjú stig fyrir annað sætið og svo framvegis.

Samkvæmt því munu Manchester City vinna deildina eftir hörku keppni við Liverpool en Tottenham og Chelsea taka síðan síðustu tvö sætin inn í Meistaradeildina. Arsenal er síðan á undan Manchester United sem situr í sjötta sæti í þeirri samantekt.

Það eru reyndar aðeins þrír sérfræðingar sem eru með Manchester United á topp fjögur en það eru auðvitað Green (2. sæti) en líka þeir Dion Dublin (4. sæti) og Nedum Onuoha (4. sæti).




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.