Tónlist

Samdi lagið eftir að hafa dreymt að hún væri með risavaxið typpi sem úr yxu blóm

Dóra Júlía Agnarsdóttir skrifar
Salka Valsdóttir gengur undir listamannsnafninu neonme í nýju tónlistarverkefni.
Salka Valsdóttir gengur undir listamannsnafninu neonme í nýju tónlistarverkefni. Blair Alexander

Lífið á Vísi kynnir frumsýningu á tónlistarmyndbandi Sölku Valsdóttur, neonme, við lagið The Flower Phallus. Blaðamaður tók púlsinn á Sölku og fékk að heyra nánar frá laginu.

Salka Valsdóttir hefur starfað við tónlist á Íslandi frá því árið 2013 og komið víða að í tónlistarheiminum. Ferill hennar hófst með hljómsveitinni Reykjavíkurdætur, en í þeirri sveit hefur Salka sinnt störfum á borð við pródúseringu, textaskrif, flutning, upptökustjórn, hljóðblöndun og masteringu. Árið 2016 stofnaði hún ásamt Jóhönnnu Rakel hljómsveitina CYBER og hefur sveitin gefið út tvær breiðskífur og þrjár smáskífur síðan hún hóf störf. Seinasta breiðskífa hljómsveitarinnar, VACATION, hlaut Íslensku Tónlistarverðlaunin árið 2020 sem plata ársins í flokki Rapp- og Hiphop tónlistar. 

Salka útskrifaðist með diplómu úr hljóðtækninámi Tækniskólans árið 2017 og hefur síðan starfað við hin ýmsu störf tengd náminu. Hún hlaut nýverið Grímuverðlaunin fyrir gerð hljóðmyndar í sýningunni Rómeó og Júlíu í Þjóðleikhúsinu. Síðastliðin þrjú ár hefur Salka svo unnið að sinni fyrstu sólóplötu undir nafninu neonme, en platan, sem ber nafnið Premiere, er væntanleg í haust.

Hér má sjá tónlistarmyndbandið: 

Hvenær byrjaðir þú að þróa þetta sóló project, neonme, og hvaðan kemur nafnið?

Verkefnið hafðist fyrir um það bil þremur árum. Ég byrjaði að semja mikið af textum sem virkuðu ekki beint eins og CYBER eða Reykjavíkurdætra textar og ég hafðist fyrir vikið við að þróa hljóðheima í kringum textana. 

Úr varð tónlist sem líktist engu sem ég hef áður gert svo það varð ljóst fyrir mér að ég þyrfti að gefa tónlistina út undir nýju nafni. 

Nafnið kom til mín á LungA 2019 þar sem ég klæddist hnéháum neongulum stígvélum. Vinkona mín lýsti stígvélunum sem neon knee highs og mér þóttu orðin svo falleg saman. Hægt og rólega þróaðist nafnið yfir í neonme sem lýsir ýktu sjálfi eða stækkuðu.

Myndirðu segja að þetta sé ólíkt því sem þú hefur gert áður?

Tónlistin er mjög ólík öllu sem ég hef áður gert. Hún líkist kannski helst því sem ég hef unnið að í leikhúsum síðustu ár. Tónlistin er mjög sérstök blanda af rökkur poppi, rómantískri óperu og avant poppi, en fer líka á köflum út í progg og ýmislegt annað. Þessi tónlist líkist í raun ekki neinu sem ég hef heyrt áður svo það er erfitt að lýsa henni.

Hvaðan sækirðu innblástur fyrir laginu The Flower Phallus?

Ég byrjaði að skrifa The Flower Phallus eftir að hafa dreymt í nokkrar nætur í röð að ég væri með risavaxið typpi sem úr yxu blóm. Ég sagði þáverandi kærustunni minni frá draumunum og hún túlkaði þá sem úrvinnslu drauma um eigið kynferði sem mér þótti mjög áhugavert. 

Ég byrjaði að útsetja lagið úr hljóðum sem mér þóttu tákna þessi tvö öfl: blómin og typpið. Grunnurinn að laginu er því hannaður úr upptökum af blómvendi sem þáverandi kærasta mín hafði nýlega gefið mér og upptökum af titraranum mínum. Ég hélt svo áfram að byggja hljóðheiminn úr hljóðum sem mér þóttu annaðhvort vera mjög lífræn og mjúk (kvenleg) eða mjög hörð og stafræn (karlæg). Úr varð lagið The Flower Phallus.

Hvernig hefur ferlið gengið við gerð tónlistarmyndbandsins?

Tónlistarmyndbandið var unnið í samstarfi við Blair Alexander Massie og Katrínu Helgu Andrésdóttur. Okkur langaði að ná utan um þessa tvo heima, heim blómanna og heim typpisins, í myndbandinu og er það því nokkuð tvískipt. Við fengum að nota rými í Ásmundarsal fyrir blómaheiminn þar sem sýning eftir Söru Björg Bjarnadóttur var uppi. Á sýningunni hafði Sara fyllt gryfju af pastellituðum svömpum sem hún var svo æðisleg að leyfa okkur að vinna með í myndbandinu. 

Ég fékk síðan Sól Hansdóttur fatahönnuð til þess að hanna á mig kjól úr svömpum í sama lit. Fyrir heim typpisins fengum við að taka upp í Sundhöllinni þar sem ég klæddist risavöxnum plastkjól eftir mömmu mína, Ilmi Stefánsdóttur. Ekki nóg með að hún hannaði kjól á mig, hún hannaði einnig risavaxið plasttyppi sem kemur fyrir í myndbandinu. Við skemmtum okkur konunglega við gerð myndbandsins og erum sjúklega ánægð með útkomuna.

Lagið er leyst út af INNI Records, útgáfufélagi í eigu Atla Örvarssonar og Colm O'Herlihy.


Tengdar fréttir

Horfist í augu við ótta sinn á kóngulóm með nýju tónlistarverkefni

Tónlistarkonan Herdís Stefánsdóttir var að senda frá sér lagið Be Human undir listamannsnafninu Kónguló. Herdís hefur komið víða að í tónlistarheiminum bæði hérlendis sem og erlendis en þetta er fyrsta útgáfa hennar sem sóló listamaður. Blaðamaður tók púlsinn á Herdísi og fékk að heyra nánar frá þessu nýja tónlistarverkefni.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.