Systur um dómararennslið: „Ákveðin martröð tónlistarmanna“

Systur fá auka hljóðtékk í dag vegna mistaka sem urðu á dómararennsli íslenska hópsins seint í gærkvöldi. 

„Við heyrðum í röddunum okkar en við heyrðum ekki í tónlistinni sjálfri, almennilega. Hún var mjög lág. Þá panikkar maður bara, ó nei,“ sagði Sigga um það sem fór í gegnum huga hennar. 

„Það er bara ákveðin martröð tónlistarmanna,“ sagði Elín. 

Þær segja vera með frábæran hóp í kringum sig sem hjálpi þeim og hafi þjálfað fyrir augnablik sem þetta. 

„Þegar maður fer í svona baklás þá þorir maður ekki að syngja út frá hjartanu. Við erum ekki bara að syngja fyrir okkur. Við erum að syngja fyrir Ísland í Eurovision,“ segir Sigga.

Þær eru sammála um að þetta verði bara geggjað í kvöld.

„Ef ekki þá stekk ég bara út í fossinn,“ segir Sigga og vísar til foss á sviðinu í höllinni í Tórínó.

„Við ætlum að bara að vera róleg, safna kröftum og kjarna okkur,“ sögðu systkinin svo um planið þeirra fram að keppninni í kvöld. 

Skammaðar fyrir kveðju til Úkraínu

Systur fengu skömm í hattinn frá Samtökum evrópskra sjónvarpsstöðva (EBU) í gær fyrir að senda Úkraínu kveðju.

„Við sögðumst elska, sögðumst standa með Úkraínu. Það má ekki, það er of pólitískt. Það má segja við elskum ykkur Evrópa, en ekki Úkraína, eða Ástralía. Það sem skipti okkur mestu máli var að Úkraínufólkið kom og þakkaði okkur fyrir stuðninginn. Við semjum víst ekki reglurnar,“ segir Sigga.

Aðspurð hvort þær ætli að verða við tilmælum EBU fyrir kvöldið líta þær hver á aðra.

„Friður,“ segja þær Systur og ómögulega að spá fyrir um upp á hverju þær taka í kvöld.

Viðtalið má sjá í heild sinni hér að ofan.