Bíó og sjónvarp

Fregnir af hruni Netflix stórlega ýktar: „Hluta­bréfa­eig­endur eru drama­drottningar“

Fanndís Birna Logadóttir skrifar
Ásgrímur Sverrisson, kvikmyndaleikstjóri og ritstjóri Klapptré, segir það líklega næsta skref að fá myndirnar sendar beint í hausinn. 
Ásgrímur Sverrisson, kvikmyndaleikstjóri og ritstjóri Klapptré, segir það líklega næsta skref að fá myndirnar sendar beint í hausinn.  Vísir/Egill

Kvikmyndaleikstjóri telur ólíklegt að streymisveitur fari sömu leið og vídeóleigur eftir fregnir af uppgjöri Netflix í vikunni. Hann segir hlutabréfaeigendur dramadrottningar en staðreyndin sé sú að samkeppnin verði sífellt harðari.

Það vakti athygli fyrr í vikunni þegar greint var frá því að áskrifendum Netflix hefði fækkað um 200 þúsund á fyrsta ársfjórðungi, þvert á væntingar hlutabréfaeigenda sem bjuggust við að þeim myndi fjölga um 2,5 milljónir.

Þetta er í fyrsta sinn í áratug sem að notendum Netflix fækkar og er talið að þeim muni fækka um tvær milljónir til viðbótar á þessum ársfjórðungi. Hlutabréfaverð hrundi í kjölfarið og virtist framtíð veitunnar vera í hálfgerðu uppnámi.

Ásgrímur Sverrisson, kvikmyndaleikstjóri og ritstjóri kvikmyndavefsins Klapptré, telur þó að fregnir af hruni Netflix séu stórlega ýktar.

„Ég held að það sé ekki mikil ástæða til að hafa áhyggjur út af fyrir sig. Hlutabréfaeigendur eru dramadrottningar, það er vitað, þannig þeir bregðast svona við í hita leiksins en svo jafnar þetta sig,“ segir Ásgrímur.

Hann bendir á að síðasta áratug hafi Netflix átt sviðið en frá þeim tíma hafa aðrar streymisveitur komið inn á markaðinn koll af kolli.

„Það sem er að gerast er að samkeppnin er að verða miklu miklu harðari og það var alveg viðbúið að það myndi eitthvað undan láta og það er hugsanlegt að þetta sé hluti af þeirri þróun,“ segir Ásgrímur.

Netflix trónir enn á toppnum og því ólíklegt að um sé að ræða upphafið að endinum, þó markaðurinn sé vissulega í sífelldri þróun.

„Hins vegar hvort þetta kerfi verði alveg svona, það er að segja Netflix sé þessi stóri aðili og svo nokkrir stórir aðilar að koma upp að þeim eins og Disney og fleiri, þetta á sjálfsagt eftir að taka nokkrum breytingum og verða öðruvísi og lenda öðruvísi. Þá erum við að tala um á næstu árum og jafnvel áratug,“ segir Ásgrímur.

Aðalvídeóleigan á Klapparstíg stendur enn og er ein eftir hér á landi. Vísir/Egill

Með komu streymisveitnanna þá hurfu vídeóleigurnar margar hverjar af markaði og hafa einhverjir slegið því upp að Netflix gæti verið að stefna í sömu átt. Ásgrímur segir erfitt að vera spámaður í þeim efnum.

„Þetta er í rauninni bara beint áframhald, þetta er bara önnur tæknileg útfærsla, þetta er bara vídeóleigan komin heim til þín, þú þarft ekki að fara út og ná í spóluna og skila henni aftur,“ segir hann um Netflix og aðrar streymisveitur.

„Það er erfitt að ímynda sér að það sé hægt að breyta því eitthvað, nema er hægt að senda þetta beint í hausinn á þér? Það er eiginlega næsta skref,“ segir hann enn fremur.


Tengdar fréttir

Mikki Mús veitir íslenskum miðlum harða samkeppni

43,1% íslenskra heimila er með áskrift að streymisveitunni Disney+ og hefur fjöldinn hátt í tvöfaldast á einu ári. Þetta sýna nýjar niðurstöður Maskínu sem rýndi í áhorfsvenjur Íslendinga. Í fyrra sögðu 24,0% svarenda að einhver á heimilinu væri með aðgang að Disney+.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.