Segir innbrotið um jólin hafa valdið fjölskyldunni mikilli skelfingu

Cancelo hefur farið á kostum með Manchester City í ensku úrvalsdeildinni í fótbolta í vetur, og verður með City gegn Sporting Lissabon í heimalandi sínu í kvöld, í Meistaradeild Evrópu.

Lífið utan vallar hefur hins vegar ekki verið auðvelt en Cancelo svaraði í gær spurningum um innbrotið á heimili fjölskyldunnar um síðustu jól.

„Þetta var skelfilegt. Þetta gerði fjölskyldu mína algjörlega skelfingu lostna,“ sagði Cancelo. „Þær verðskulduðu ekki að þurfa að ganga í gegnum þetta. Svona er lífið. Þetta getur gerst,“ sagði Cancelo.

Cancelo, sem er 27 ára gamall, reyndi að stöðva innbrotsþjófana, sem hann kallaði raggeitur á samfélagsmiðlum, en hlaut í staðinn áverka í andliti. Þjófarnir stálu öllum skartgripum á heimilinu.

Sterkari eftir fyrri áföll

„Það mikilvægasta er fjölskyldan mín og sem betur fer er í lagi með hana,“ skrifaði Cancelo á Instagram eftir innbrotið. „Eftir þær hindranir sem ég hef þurft að komast yfir í lífinu þá er þetta bara ein til viðbótar. Fastur fyrir og sterkur, eins og alltaf,“ skrifaði Cancelo.

Hann var 18 ára gamall þegar móðir hans, Filomena, lést í bílslysi. Cancelo og bróðir hans, Pedro, voru einnig í bílnum en hlutu aðeins minni háttar áverka. Cancelo hefur síðan oft tileinkað árangur sinn Filomenu.

Cancelo kom til City frá Juventus árið 2019 og varð Englandsmeistari í fyrra auk þess að komast í úrslitaleik Meistaradeildarinnar. Hann stefnir á að hjálpa liðinu að vinna Meistaradeildina í fyrsta sinn en til þess þarf liðið að byrja á að slá Sporting Lissabon út og hefst fyrri leikur liðanna kl. 20 á Stöð 2 Sport 2.