„Ótrúlegt hvað lifandi tónlistarflutningur getur gert fyrir þreyttar sálir í skammdeginu“

Nýstofnaður kvartett stígur á stokk en hann skipa þau Jóna G. Kolbrúnardóttir sópran, Kristín Sveinsdóttir mezzósópran, Eggert Reginn Kjartansson tenór og Unnsteinn Árnason bassi. Öll eru þau þaulreynd á sínu sviði.

Hafa sungið saman frá ungum aldri

Þau byrjuðu ung að koma fram saman í Langholtskirkju kór undir stjórn Jóns Stefánssonar og síðan lá leið þeirra allra til Vínarborgar í söngnám. Ásamt því að koma reglulega fram í ýmis konar verkefnum í Vín hafa þau einnig sungið á óperusviði víðs vegar um Evrópu.

Kristín starfaði við La Scala Óperuna í Mílanó, Eggert starfaði í óperunni við Baden Wien og í Salzburg, Jóna söng nýlega við Konunglegu óperuna í Kaupmannahöfn ásamt því að koma reglulega fram með Sinfóníuhljómsveit Íslands og Unnsteinn hefur síðastliðin ár verið fastráðinn við óperuna í Innsbruck í Austurríki. Á tónleikunum spilar Þóra Kristín Gunnarsdóttir píanóleikari með þeim, sem er nýkomin heim eftir nám og störf í Sviss.

„Við fjögur þekkjumst auðvitað mjög vel og það er fátt skemmtilegra en að syngja saman. Þess vegna eru tónleikarnar byggðir mikið á dúettum og kvartettum.

Eftir að við sungum yfir fyrsta kvartettinn á fyrstu æfingunni okkar saman þá, þó það sé mikil klisja að segja, ljómuðum við öll af gleði.

Það eru svona augnablik sem minna mann á hvað söngur er magnaður og þá sérstaklega samsöngur. Við vonumst til að geta glatt áhorfendur jafn mikið á tónleikunum og söngurinn gleður okkur,“ segir söngkonan Jóna G. Kolbrúnardóttir.

Tónlistin haldi áfram að hljóma sama hvað

„Það er okkur hjartans mál að tónlistin haldi áfram að hljóma og vera flutt fyrir áheyrendur sama hvað á dynur í samfélaginu,“ segir hópurinn og bætir við: 

„Það er ótrúlegt hvað lifandi tónlistarflutningur getur gert fyrir þreyttar sálir í skammdeginu.“

Kvartettinn ætlar að taka vel á móti hækkandi sól og bjóða upp á klukkutíma tónleika þar sem söngperlur eftir íslensk og þýsk tónskáld verða flutt, einsöngslög í bland við dúetta og kvartetta.

„Við fögnum sömuleiðis nýlegum tilslökunum í sóttvarnar aðgerðum og höfum bætt við miðum á báða tónleika,“ segja þau að lokum. Miðasala fer fram hér.