Veður

Kröpp lægð nálgast landið og appel­sínu­gular við­varanir

Atli Ísleifsson skrifar
Viðvaranirnar taka gildi um miðjan dag eða eftir hádegi og gilda fram á kvöld og sums staðar fram á nótt.
Viðvaranirnar taka gildi um miðjan dag eða eftir hádegi og gilda fram á kvöld og sums staðar fram á nótt. Veðurstofan

Kröpp lægð er nú skammt vestur af landinu og hún fer austnorðaustur yfir land í dag. Veðurstofan gerir ráð fyrir að það verði því vaxandi suðvestanátt fyrri part dags og rigning eða skúrir, en þurrt að kalla norðaustanlands. Hiti verður á bilinu núll til sex stig.

Í hugleiðingum veðurfræðings á vef Veðurstofunnar segir að víða verði vestan stormur eða rok seinnipartinn og kólni með éljum, en heldur hægari vindur og samfelldari úrkoma nyrst á landinu.

„Það er sem sagt útlit fyrir varasamt ferðaveður víðast hvar á landinu í dag, og gular eða appelsínugular viðvaranir eru í gildi í flestum landshlutum.

Vindakortið fyrir klukkan 17 í dag.

Það lægir á vestanverðu landinu í kvöld, og austantil í nótt og fyrramálið. Á morgun verður svo hægur vindur á landinu og víða dálítil él, en yfirleitt þurrt á Norðurlandi. Frost 0 til 8 stig.“

Viðvaranirnar taka gildi um miðjan dag eða eftir hádegi og gilda fram á kvöld og sums staðar jafnvel fram á nótt.

Spákortið fyrir klukkan 17 í dag.Veðurstofan

Veðurhorfur á landinu næstu daga

Á miðvikudag: Breytileg átt 3-10 m/s. Bjart með köflum, en dálítil él við S- og V-ströndina, og einnig NA-lands fram eftir degi. Frost 0 til 8 stig.

Á fimmtudag: Suðvestan 5-13 og él, en bjart að mestu A-lands. Hiti breytist lítið. Sunnan 8-15 um kvöldið og hlýnar með rigningu eða slyddu S- og V-lands.

Á föstudag: Snýst í suðvestan og vestan 10-18 með éljum um landið V-vert. Dálítil slydda eða snjókoma A-lands, en styttir upp þar eftir hádegi. Kólnar í veðri. Hvessir allvíða um kvöldið.

Á laugardag og sunnudag: Vestan- og suðvestanátt og él, en lengst af þurrt A-lands. Frost 0 til 9 stig.

Á mánudag: Norðlæg átt og él, en lengst af þurrt sunnan heiða. Talsvert frost.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.