Innlent

Bendir Andrési Inga á að til séu lyf við flökurleika

Jakob Bjarnar skrifar
Ýmsum í stjórnarandstöðunni þykir þetta heldur óárennilegt þríeyki. Jón Gunnarsson og aðstoðarmenn hans tveir, Brynjar Níelsson og Hreinn Loftsson.
Ýmsum í stjórnarandstöðunni þykir þetta heldur óárennilegt þríeyki. Jón Gunnarsson og aðstoðarmenn hans tveir, Brynjar Níelsson og Hreinn Loftsson.

Brynjar Níelsson fyrrverandi þingmaður, nýr aðstoðarmaður Jóns Gunnarssonar innanríkisráðherra, segir ljóst að ráðherra ætli að láta hendur standa frammúr ermum og vilji því fá reynda aðstoðarmenn.

Eins og Innherji greindi frá fyrr í dag hefur Brynjar verið ráðinn sem aðstoðarmaður Jóns auk Hreins Loftssonar lögmanns.

„Jón vill fá mann sem hefur reynslu af málaflokknum og þekkir þingið þannig að segja má að hann sé að slá tvær flugur í einu höggi. Ég reikna með því,“ segir Brynjar í samtali við Vísi.

Komið hefur fram að ýmsum þeim sem tilheyra stjórnaraandstöðunni líst ekki á blikuna, að þarna sé komin býsna harðsnúinn flokkur manna í innanríkisráðuneytið. 

Andrési Inga líst ekki á blikuna

Andrés Ingi Jónsson þingmaður Pírata gerði skipan Jóns að sérstöku umfjöllunarefni í sinni ræðu á þinginu í gær, þegar Katrín Jakobsdóttir flutti stefnuræðu sína í gær, að það væri móðgun við fólk „gerir réttmæta kröfu um löngu tímabærar framfarir í þágu réttlætis.“ Og þegar hann sá fréttirnar í morgun varð honum hreinlega flökurt og tjáði það á Twitter.

Brynjar segir þá þrjá auðvitað menn sem standa fyrir eitthvað, hafi allir verið í pólitík og þekkja það. Báðir aðstoðarmennirnir, hann og Hreinn, þekki þessa málaflokka vel frá sitthvorum vinklinum.

„Jón er að fá menn með fjölbreytta reynslu og ég skil ekki af hverju menn eru að gagnrýna það. Menn geta haft ýmsar skoðanir í pólitík. Ekki héldu þeir að hann myndi fá einhverja menn úr vinstri flokkunum til að aðstoða sig? Þeir hafa kannski reiknað með því, ég veit það ekki. En það þarf að benda Andrési á að það eru til lyf við flökurleika.“

Brynjar náði ekki inn á þing í síðustu kosningum en er nú kominn á þingið bakdyramegin aftur. Er þetta svona gott mötuneyti?

„Nei, það er það nú ekki en einhvers staðar verður maður að borða. 

En það var sem sagt óskað eftir þessu þá verður maður bara við því nema einhver fyrirstaða sé. Þetta er auðvitað bara tímabundið.“

Ætla að láta hendur standa fram úr ermum

Fram hefur komið að Jón verður skipaður innaríkisráðherra í 18 mánuði í lengsta falli og þá taki Guðrún Hafsteinsdóttir 1. þingmaður í Suðurkjördæmi við. Brynjar segir þetta nýja starf leggjast ágætlega í sig, þau séu mörg mál sem þurfi að laga og ýta úr vör.

Jón Gunnarsson tekur við lyklunum að innanríkisráðuneytinu en Áslaug Arna Sigurbjörnsdóttir færir sig um set.vísir/vilhelm

„Það fer svo eftir því hvað ráðherra ætlar að setja puttann á púlsinn og hvaða hugmyndir hann hefur með að forgangsraða og svoleiðis. Ég er bara til aðstoðar og að veita góð ráð þegar eftir því er leitað. Þetta er ekkert öðruvísi.“

Viðleitnin hefur heldur verið sú að aðstoðarmenn ráðherra hafi síðar látið á það reyna að komast á þing. „Já, ég geri allt öfugt,“ segir Brynjar. Hann segir þetta sérstakar aðstæður.

„Ráðherra á stuttum tíma þarf að láta hendur standa fram úr ermum og setja mark sitt á þetta. Og þá ákveður hann að leita til manna sem þekkja málaflokkinn og ekkert óeðlilegt við það. þó hann hafi verið alþingismaður áður. ekki eins og ég sé tekinn út úr móanum.“


Tengdar fréttir

Afturhaldsöflin sem rækta húsbóndavaldið

Í umræðum um stefnuræðu forsætisráðherra í gærkvöldi fór Andrés Ingi Jónsson, þingmaður Pírata, hörðum orðum um skipun tveggja ráðherra í nýrri ríkisstjórn.

Brynjar verður aðstoðarmaður innanríkisráðherra

Brynjar Níelsson, fyrrverandi þingmaður Sjálfstæðisflokksins, verður aðstoðarmaður Jóns Gunnarssonar í innanríkisráðuneytinu samkvæmt heimildum Innherja. Brynjar á að baki langan feril úr lögmennsku.

Fyrsti fundur nýrrar ríkisstjórnar

Ný ríkisstjórn Sjálfstæðisflokksins, Framsóknarflokksins og Vinstri hreyfingarinnar - græns framboðs kom saman á ríkisráðsfundi á Bessastöðum í dag. Ráðherrar ríkisstjórnarinnar fjölgar um einn frá síðustu ríkisstjórn og eru tólf.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.