Jóhann Berg og Alfreð eru hvorugur í landsliðshópnum

Óskar Ófeigur Jónsson skrifar 4. nóvember 2021 13:12

Jóhann Berg Guðmundsson og Alfreð Finnbogason eru ekki með. Vísir/Hulda Margrét

Landsliðsþjálfarinn Arnar Þór Viðarsson hefur tilkynnt hvaða leikmenn verða í hópnum sem spilar tvo síðustu leiki sína í undankeppni HM nú í nóvember.

Arnar velur 24 leikmenn í hópinn en í honum eru ekki þeir Jóhann Berg Guðmundsson og Alfreð Finnbogason sem eru báðir búnir að ná sér af meiðslum.

Jóhann Berg, sem var fyrirliði íslenska landsliðsins í haust, gaf ekki kost á sér í síðasta verkefni af því að hann var tæpur vegna meiðsla. Hann tjáði um leið óánægju sína og sagði að vinnubrögð KSÍ vikurnar á undan hafi haft áhrif á ákvörðun hans um að draga sig úr hópnum. Alfreð er nýbyrjaður að spila eftir langan meiðslatíma.

Guðlaugur Victor Pálsson er heldur ekki valinn í hópinn að þessu sinni en hann yfirgaf liðið í miðju síðasta verkefni.

Ísland mætir Rúmeníu og Norður Makedóníu en báðir leikirnir eru spilaðir erlendis. Liðið mætir Rúmeníu á National Arena í Bucharest fimmtudaginn 11. nóvember kl. 19.45 og Norður Makedóníu á National Arena Todor Proeski sunnudaginn 14. nóvember kl. 17:00.

Aðrir sem detta út úr hópnum frá síðasta verkefni eru þeir Jón Guðni Fjóluson, Hjörtur Hermannsson, Mikael Neville Anderson og Elías Már Ómarsson.

Inn í hópinn koma þeir Ísak Óli Ólafsson, Aron Elís Þrándarson og Arnór Ingvi Traustason.