Innlent

Bjarga verðmætum áður en hraunið tekur bæinn

Kristján Már Unnarsson skrifar
Stefanía Haraldsdóttir ber út spegil úr bústað á jörðinni Ísólfsskála í dag.
Stefanía Haraldsdóttir ber út spegil úr bústað á jörðinni Ísólfsskála í dag. Arnar Halldórsson

Landeigendur Ísólfsskála keppast nú við að bjarga lausamunum og öðrum verðmætum áður en hraun flæðir yfir jörðina. Á sama tíma er verið að stika nýja gönguleið á stað þaðan sem sést yfir eldgíginn og áformað að opna nýtt bílastæði.

Dalverpið Nátthagi er fjölsóttasti staðurinn við gosstöðvarnar þessa dagana en þar komast ferðamenn í návígi við nýrunnið hraunið. Í dag virtist okkur sem útlendingar væru þar í talsverðum meirihluta en í fréttum Stöðvar 2 mátti sjá að sumir hikuðu ekkert við að ganga út á hraunið.

Á jörðinni Ísólfsskála voru þau Halldór Ármannsson og Stefanía Haraldsdóttir á sama tíma að bera lausamuni úr bústaðnum sínum út í sendiferðabíl. Þau voru að pakka saman.

Stefanía Haraldsdóttir og Halldór Ármannsson við bústað sinn, Bjallabæ, í dag.Arnar Halldórsson

„Já, það virðist allt stefna í að þetta komi hérna niður, bara á næstu einni eða tveimur vikum, segja þeir,“ segir Halldór, sem er í eigendahópi Ísólfsskála.

-Þannig að þið eruð bara í verðmætabjörgun?

„Já, við erum bara að reyna að bjarga öllu, - það sem maður getur farið með.“

Þau fóru einnig inn í Nátthaga í dag til að kanna aðstæður. Þar skreið hrauntungan hratt fram um síðustu helgi en hefur síðan lítið hreyfst. Nýtt hraunflæðilíkan Veðurstofunnar gerir þó ráð fyrir að hraunið muni ná Suðurstrandarvegi og Ísólfsskála um síðir, haldi gosið áfram.

„Þetta er bara grátlegt, bara í einu orði sagt,“ svarar Stefanía, spurð um tilfinningarnar sem bærast með þeim, núna þegar þessi ógn og örlög vofa yfir jörðinni.

„Ég er búinn að vera hérna frá því ég var fimm ára. En maður spyr ekkert almættið. Maður ræður ekkert við það,“ segir Halldór.

Niðurstaða yfirvalda var að ekki væri raunhæft að verja Ísólfsskála með varnargörðum.

„Í fyrsta lagi er þetta mjög dýrt, hleypur á mörghundruð milljónum. Í öðru lagi þá er ekki víst að þetta myndi duga, allavega ekki til langframa. Þannig að það var ekki talið verjandi að reyna þetta vegna þess að árangurinn gæti verið lítill sem enginn,“ segir Fannar Jónasson, bæjarstjóri Grindavíkur.

Séð yfir Suðurstrandarveg og Ísólfsskála.Arnar Halldórsson

Í dag var hins vegar unnið að því að verja ljósleiðara við Suðurstrandarveg með því að leggja þykkari jarðveg ofan á hann.

„Í þeirri von að hann verði ekki fyrir neinum skemmdum þegar og ef hraun fer að renna þarna yfir,“ segir Fannar.

Um leið er þess freistað að greiða leið ferðamanna að sjónarspilinu. Eftir að hraunrennsli lokaði gömlu aðalleiðinni, gönguleið A, virðast ferðamenn núna hafa fundið nýja aðalgönguleið til að geta séð eldgíginn; upp á Langahrygg austan Nátthaga.

Þar er núna verið að stika leiðir en einnig áformað að opna nýtt bílastæði á túni í svokölluðum Stóra-Leirdal, en þaðan er styttra upp á Langahrygg.

„Þaðan er mjög víðsýnt og sést til gígsins. Og það sést yfir hraunið í Nátthaganum. Þannig að það er eiginlega sá staður sem er langákjósanlegastur núna,“ segir bæjarstjóri Grindavíkur.

Hér má sjá frétt Stöðvar 2:


Tengdar fréttir

Myndi vilja leggja sig hjá kúnum í Nátthaga og láta hrauna yfir sig

Guðbergur Bergsson rithöfundur heimsótti æskuslóðir sínar á Ísólfsskála í dag þar sem fornleifafræðingar frá Minjastofnun vinna í kappi við hraunrennslið að kanna fornminjar. Sjálfur skoðaði Guðbergur nýja hraunið í Nátthaga þar sem hann var kúasmali á yngri árum.

Svona gæti hraunið litið út í lok sumars

Veður­stofan og Há­skóli Ís­lands hafa gefið út nýtt hraun­flæði­líkan, sem sýnir tvær mögu­legar sviðs­myndir fyrir hraun­flæði úr Nátt­haga. Ó­vissa er uppi um hve­nær hraun byrjar að flæða suður úr Nátt­haga eftir að svæðið fyllist af hrauni.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.