Steinunn Ása afhenti fyrstu hjólin

Sunna Karen Sigurþórsdóttir skrifar 19. mars 2021 19:36

Steinunn Ása Þorvaldsdóttir, baráttu- og sjónvarpskona. Vísir/Vilhelm

Sjónvarpskonan Steinunn Ása Þorvaldsdóttir sem afhenti fyrstu hjólin í hjólasöfnunarátaki Barnaheilla í dag segir mikilvægt að fólk láti gott af sér leiða. Hún hvetur alla til að leggja átakinu lið.

„Ég er eiginlega bara talskona þeirra sem þurfa á því að halda. Það er mjög mikilvægt að við höfum rödd í samfélaginu, þannig að ég sagði bara já,“ segir Steinunn, aðspurð hvers vegna hún tók verkefnið að sér.

„Mér finnst þetta skipta máli. Ég afhenti fyrsta hjólið í fyrsta skipti og finnst gott að geta látið gott af mér leiða,“ bætir hún við.

Hjólin verða gefin börnum og unglingum sem hafa ekki tök á að kaupa sér reiðhjól, og verður þeim úthlutað í gegnum félagsþjónustuna. Erna Reynisdóttir, framkvæmdastjóri Barnaheilla, segir að um ellefu hundruð hjól hafi verið gefin í söfnunina í fyrra.

„Við hvetjum landsmenn til að gefa okkur hjól, en helst langar okkur að kalla eftir sjálfboðaliðum til að gera við hjólin. Hingað koma hjól í alls konar ástandi og þá þurfum við fólk sem hjálpar okkur að gera við þau, gera þau fín og tilbúin fyrir börn til að hjóla inn í sumarið,“ segir Erna.

Hjálparstarf Hjólreiðar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.