Sátt náðist í Sólheimadeilunni

Tíu mánaða löngum viðræðum milli Sólheima í Grímsnesi og sveitarfélaganna á Suðurlandi lauk í gær með undirritun þjónustusamnings til þriggja ára. Niðurstaðan er ásættanleg að mati framkvæmdastjóra stofnunarinnar.

Samningurinn var undirritaður í húsakynnum ríkissáttasemjara síðdegis í gær. Sólheimar, sem þjónustar fólk með þroskahömlun, hafa verið án samnings frá því um síðustu áramót, eða frá því að sveitarfélögin tóku við málefnum fatlaðra. Guðmundur Ármann Pétursson, framkvæmdastjóri Sólheima, segir ferlið hafa verið langt. „Þannig að það er svona þess meiri léttir að það sé búið að skrifa undir samning. Reyndar á bæði fulltrúaráð Sólheima eftir að fá samninginn til umfjöllunar og líka bakland Árborgar."

En hvað varð til þess að sátt náðist í gær?

„Árborgarfólk hefur sýnt mikil heilindi í málinu og þetta hefur verið leitt vel af hendi ríkissáttasemjara og svo hefur líka tekið drjúgan tíma að fá gögn sem voru málinu nauðsynleg þannig að hægt væri að klára þetta. Þetta hefur jafnt og þétt verið að færast nær endamarkinu og menn náðu að setja stafina sína undir í gær og það var góð tilfinning."

Guðmundur vill ekki greina frá efni samningsins fyrr en hann fer fyrir fulltrúaráð Sólheima og stjórn þjónustusvæðis um málefni fatlaðra á Suðurlandi.

Ég vona auðvitað að hann verði staðfestur hjá báðum aðilum og það verði hægt að horfa meira til framtíðar en fortíðar.

En ert þú sáttur sjálfur við samninginn?

„Já já. Við hefðum ekki gert þetta öðruvísi en að við værum ógurlega sáttir. Það eru auðvitað tveir sem eru, og auðvitað, menn vilja alltaf eitthvað öðruvísi, það verður alltaf, en ég held að þetta sé ásættanlegt fyrir báða aðila."