Í verkfall sem foreldrar

Hjón í Flórída eru farin í verkfall sem foreldrar, þangað til börnin þeirra taka til í herberginu sínu. Cat og Harlan Barnard segjast hafa suðað í 17 ára syni sínum Benjamín og 12 ára systur hans Kit um að vaska upp, slá blettinn og taka til í herberginu sínu, þangað til þau gáfust upp og ákváðu að kenna börnum sínum lexíu. Síðastliðna viku hafa hjónin búið í tjaldi í garðinum, og fara aðeins inn í húsið til að nota baðherbergið. Þau segjast ekki ætla að elda, þrífa eða keyra börnin þar til þau fara að taka þátt í heimilisstörfunum. Cat segir að það hafi ekki verið neitt eitt korn sem fyllti mælinn, heldur hafi ástandið bara alls ekki lagast og þeim hafi þótt tími til kominn að kenna börnunum sínum að hætta að vera svo sjálfselsk sem raun bar vitni. Lögreglan á staðnum hefur nokkrum sinnum litið við, og segir að börnin hafi það bara ágætt inni í húsinu.