Dvalargjöld hækka í skólum Hafnarfjarðar

Bæjarráð Hafnarfjarðar samþykkti í morgun tillögu fræðsluráðs um gjaldskrár í leik-, grunn- og tónlistarskóla fyrir næsta skólaár, frá 1. ágúst 2010 til júlíloka árið 2011.

Samþykkt var að matarverð í leik- og grunnskólum verður óbreytt í allan vetur miðað við síðasta skólaár. Almenn dvalargjöld munu hækka um 5 prósent í ljósi verðlagshækkunar og gildir það um dvöl í heilsdagsskóla, leikskóladvöl og nám í Tónlistarskóla Hafnarfjarðar. Frá sama tíma mun systkinaafsláttur í leikskóla einungis gilda um almennt dvalargjald og því ekki af forgangsgjaldskrá eða matargjaldi en áfram er óbreytt með systkinaafslátt af dvalargjaldi heilsdagsskóla og námi í Tónlistarskóla Hafnarfjarðar.

Þá var einnig tekin ákvörðun um að frá næstu áramótum kæmi fram á innheimtuseðlum fræðslusviðs kostnaðarhlutur notenda af þjónustu fræðslusviðs og hver hlutur bæjarins væri á móti notendum þannig að raunkostnaður þjónustu komi fram á greiðsluseðlum.

Í samræmi við það verður gerð ítarleg úttekt á samsetningu, kostnaðarþáttur notenda og kostnaðarþáttur bæjarins, þjónustugjalda á fræðslusviði og í framhaldinu verði gjaldskrár endurskoðaðar. Það kæmi í fyrsta lagi til framkvæmdar frá hausti 2011 eftir að slík úttekt hefur farið fram og kynnt.