Grænmeti stolið frá sjö ára börnum í Kópavogi

„Auðvitað er þetta mjög leiðinlegt og krakkarnir eru mjög leiðir," segir Bryndís Pétursdóttir, garðstjóri í skólagörðum við Dalveg í Kópavogi. Á þriðjudaginn var hvítkáli og hnúðkáli stolið úr skólagörðum sem sextíu og fimm krakkar á aldrinum 7 til 12 ára hafa verið að rækta í allt sumar. Einungis kálið var tekið og blöðin skilin eftir en engin skemmdarverk voru unnin á görðunum að öðru leyti.

„Við erum búin að vera vinna í þessu síðan í lok maí. Þannig við erum búin að bíða í allt sumar eftir að grænmetið verði tilbúið og svo loksins þegar það er að verða tilbúið þá kemur þetta upp," segir Bryndís en krökkunum var mjög brugðið að hennar sögn. „Við, starfsmennirnir, vorum líka rosalega reið. En sem betur fer erum við með auka garða sem við erum búin að vera rækta þannig þau fá það grænmeti í staðinn, en auðvitað finnst þeim þetta samt mjög leiðinlegt."

Bryndís segir að grænmetinu hafi verið stolið að nóttu til þar sem allt var á sínum stað á mánudeginum þegar þau fóru úr vinnunni. Aðspurð hvern hún gruni um að hafa verið að verki segir Bryndís að það sé ómögulegt að segja en „mér finnst líklegt að þetta hafi ekki verið krakkar að leika sér því þá hefðu þau varla skilið bara eftir blöðin, sá sem stal þessu vissi greinilega hvað hann var að gera."

Fimm skólagarðar eru í Kópavogi í sumar og segir Bryndís að hennar garður sé sá eini sem hafi lent í þessu. „Ég var hérna í fyrra líka og varð þá ekki var við neitt svona," segir Bryndís en ekki var haft samband við lögreglu en hún lét yfirmenn sína hjá Kópavogsbæ vita.