Hvetja kortanotendur til að gæta öryggis

Í ljósi upplýsinga frá lögreglu um óprúttna aðila sem hafa verið á kreiki við hraðbanka og reyna að ná PIN-númerum og öðrum kortaupplýsingum af fólki, vilja Samtök fjármálafyrirtækja minna korthafa á að gæta alltaf fyllstu varkárni við hraðbanka.

Vísir sagði frá því í dag að lögreglunni hefði borist kærur vegna þess að afrit af segulröndum debetkorta og upplýsingum um PIN númer þeirra hefur verið náð af viðskiptavinum hraðbanka hér á landi.

Samtök fjármálafyrirtækja minna korthafa á að hafa jafnan eftirfarandi atriði í huga þegar kort eru notuð:

· Verndaðu PIN númerið þitt mjög vel og gættu þess að enginn sjái innsláttinn.

· Ekki þiggja aðstoð ókunnugra í eða við hraðbanka.

· Ekki afhenda öðrum kortið þitt undir nokkrum kringumstæðum

· Hafðu sjálfur samband við þjónustuborð viðskiptabanka þíns eða kortafyrirtækis ef þú lendir í vandræðum með úttekt í hraðbanka. Ekki þiggja aðstoð einhvers sem býðst til þess að hringja fyrir þig.

· Hættu við úttekt og komdu síðar ef þú verður var/vör við grunsamlegar mannaferðir við hraðbankann.

· Láttu loka kortinu þínu ef þú telur hugsanlegt að upplýsingar hafi komist í hendur annarra.