Furðuljós á himnum reyndust vera Iridíumblossar

„Þetta var mjög áberandi þegar við keyrðum upp götuna," segir Hjálmar Þór Hjálmarsson sem náði myndum af sérkennilegum ljósum á næturhimninum rétt fyrir klukkan átta í gærkvöldi. Myndbandið var tekið upp í Mosfellsbæ og er linsunni beint í áttina að Þingvöllum.

Hjálmar var að keyra ásamt kærustu sinni þegar hann sá blossa á svörtum himninum og reif þá upp símann og náði myndbandi af furðuljósunum. Hjálmar sendi svo myndbandið á fréttastofuna sem leitaði skýringa á ljósunum.

Að sögn Sævars Helga Bragasonar, stjörnufræðingi, urðu Hjálmar og kærasta hans vitni að því þegar gervitunglaklasi kenndur við Iridíum endurvarpaði ljósi frá sólinni. Um er að ræða svokallaða Iridíumblossa. Tunglin eru 66 talsins og ganga um jörðu í 790 kílómetra hæð og fara nálægt heimskautunum.

Flest gervitungl nota loftnet sem hafa skálarlögun, en Iridíumtunglin bera annarskonar loftnet sem eru flöt og líta út eins og stórir speglar. Hvert gervitungl hefur þrjú slík loftnet sem endurvarpa sólarljósinu, og ef athugandi lendir í einhverjum geislanna sér maður glampa sem getur verið hundraðfalt bjartari en Venus, sem er skærasta stjarnan á himnum í myrkasta skammdeginu.

„Þetta er í raun algengasta ástæðan fyrir því að tilkynnt er um fljúgandi furðurhluti," segir Sævar Helgi og því er ekki undarlegt að fólk verði undrandi þegar það sér ljósin á himnum.

Sævar Helgi bætir við að blossarnir séu daglegt brauð. „Eina kúnstin er í raun að vita hvert og hvenær maður á að horfa," segir Sævar Helgi en ferli tunglanna er svo nákvæmlega skrásett að það er hægt að vita með nákvæmri vissu hvenær og hvar næstu blossar verða.

Þannig er hægt að sjá annað eins í kvöld klukkan 19:27:21 sé litið til himins í norðvestri. Blossarnir verða þá í 22 gráðum yfir sjóndeildarhring. Þá munu blossarnir aftur lýsa upp himininn í norðaustri klukkan 19:35:57.

„Þetta getur líka verið skemmtilegur samkvæmisleikur," segir Sævar Helgi og bætir við að það geti verið skemmtilegt, ef ekki rómantískt, að koma vinum og vandamönnum á óvart og sýna þeim þennan sérkennilega ljósagang.

Hægt er að horfa á blossana í myndbandinu sem Hjálmar Þór tók upp í gær hérna.