Kynsjúkdómurinn sárasótt vaxandi vandamál í Evrópu

Kynsjúkdómurinn syfilis eða sárasótt er nú vaxandi vandamál í mörgum af helstu stórborgum Vestur-Evrópu. Fyrir 25 árum var talið að sjúkdóminum hefði verið nær útrýmt í álfunni

Tölur yfir fjölda tilfella af sárasótt í Bretlandi undanfarinn áratug eru sláandi. Árið 1997 voru skráð 307 tilfelli af þessum kynsjúkdómi þar í landi en í fyrra voru tilfellin orðin rúmlega 3.700 talsins sem er aukning upp á um 1.200%.

Og svipaða þróun er að finna í öðrum löndum. Í borgum á borð við London, Dublin, Berlin, Paris og Rotterdam hefur sárasóttartilfellum fjölgað mjög mikið á síðustu árum. Þar að auki hefur aukning orðið á sárasótt í löndum á borð við Bandaríkin, Kanada og Ástralíu.

Sárasóttin greinist einkum meðal samkynhneigðra karlmanna en sárasótt smitast nær eingöngu með kynmökum.. Á tveimur síðustu áratugum gerði óttinn við eyðni það að verkum að þessi hópur stundaði öruggt kynlíf en ný lyf gegn eyðni hafa gert það að verkum að slíkt fer minnkandi.