Mikill verðmunur hjá fiskbúðum

Verðlagseftirlit Alþýðusambands Íslands gerði nýverið verðasamanburð á fiskafurðum í 25 fiskbúðum og öðrum verslunum með fiskborð. Verð var kannað á 33 algengustu tegundum fiskafurða. Fiskbúðin Hafberg, Fiskikóngurinn, Fiskbúðin Vegamót Nesvegi og Fiskbúðin Vík Reykjanesbæ neituðu þátttöku í könnuninni samkvæmt tilkynningu frá ASÍ.

Verðmunurinn á hæsta og lægsta verði meiri en 50 prósent í nærri því þremur fjórðu afurðum sem kannaðar voru. Lægsta verðið fannst oftast í í Litlu Fiskbúðinni Miðvangi í Hafnarfirði eða í fjórtán tilvikum af 33.

Verslunin kjöt og fiskur við Bergstaðarstræti var með hæsta verðið í sex tilvikum af 33 og Melabúðin, Hafið fiskiprinsinn Hlíðarsmára og Gallerý fiskur Nethyl voru með hæsta verðið í fjórum tilvikum. Þá voru allar tegundirnar 33 aðeins til í Fiskbúð Sjávarfangs á Ísafirði. Þar á eftir komu Litla fiskbúðin Háaleitisbraut og Gallerý fiskur sem áttu til 30 tegundir.

Fæstar tegundirnar sem skoðaðar voru, voru til hjá Fiskbúðinni Sjávarhöllin Hólagarði eða aðeins níu tegundir af 33 og Samkaup-Úrval Hafnarfirði átti tólf tegundir.

Í könnuninni var munur á hæsta og lægsta verði allt frá 24 prósentum upp í 153 prósent. Mestur var munurinn á súrum hval sem kostaði 3.763 kr/kg hjá Fiskibúð Sjávarfangs en 1.490 kr/kg Litlu fiskibúðinni við Háaleitisbraut. Það er 2.273 krónu verðmunur eða 153 prósent.

Minnstur verðmunur var á roðflettu og beinlausu ýsuflaki sem var ódýrast á 1.690 kr./kg. hjá Litlu fiskbúðinni Miðvangi en dýrast á 2.090 kr./kg. hjá Hagkaupum Kringlunni og Kjöt og fisk, en það er 400 kr. verðmunur eða 24 prósent.

Nánari upplýsingar má sjá á töflunni sem sækja má hér að neðan.

Könnunin var gerð í eftirtöldum verslunum:

Fiskbúðinni Sundlaugavegi

Kjöt og fisk Bergstaðarstræti

Þinni verslun Seljabraut

Fisk kompaní Akureyri

Fiskbúð Suðurlands Selfossi

Melabúðinni

Fiskbúðinni Hafrúnu Skipholti

Fiskbúðinni Fiskás Hellu

Samkaupum Úrval Hafnarfirði

Nettó Granda

Fjarðarkaupum Hafnarfirði

Fiskbúðinni Trönuhrauni

Fiskbúðin Sjávarhöllin Hólagarði

Fiskbúðinni Vík Reykjanesbæ

Ship O Hoj Reykjanesbæ

Litlu Fiskbúðinni Miðvangi og Háaleitisbraut

Hafinu fiskverslun Hlíðasmára

Nóatúni Háaleitisbraut

Fiskbúð Hólmgeirs Þönglabakka

Gallerý fisk Nethyl

Fiskbúðinni Hófgerði

Fiskbúð Sjávarfangs Ísafirði

Fiskbúðinni Mos Mosfellsbæ

Fiskbúð Siglufjarðar og Hagkaupum Kringlunni

Fiskbúðin Hafberg

Fiskikóngurinn

Fiskbúðin Vegamót Nesvegi og Fiskbúðin Vík Reykjanesbæ neituðu þátttöku í könnuninni.