Rafmagn til húshitunar hækkar

Tryggvi Þór Haraldsson, forstjóri Rafmagnsveitna ríkisins, segir verðhækkanir á rafmagni til húshitunar verði á bilinu 15-20 prósent, vegna breytinga á lögum um raforkusölu. Kristján Möller, þingmaður Samfylkingar segir þessa hækkun koma sem rýtingsstungu í bakið á þeim sem búa við þennan upphitunarkost. Í umræðunni um breytt raforkulög hafi verið áætlaðar 230 milljónir í niðurgreiðslu vegna þessa og alltaf hafi verið talað um ef það dygði ekki til, yrði bætt úr því. "Valgerður Sverrisdóttir og ríkisstjórnin verður að gjöra svo vel og koma með meiri pening. Það segir sig sjálft þegar 230 milljónir duga ekki fyrir þessari hækkun á dreifbýlisupphitun." Birkir Jónsson, þingmaður Framsóknarflokks og formaður iðnaðarnefndar segir iðnaðarnefnd muni skoða málið. Reynsla í nýskipuðu umhverfi raforkumála eigi eftir að koma í ljós og gjaldskrá orkufyrirtækjanna sé að birtast þessa dagana. "Í framhaldi munum við meðal annars athuga stöðu þeirra rafnotenda sem þarna um ræðir. Við fjárlagagerðina núna í haust var gengið út frá því að þessar 230 milljónir myndu að öllum líkindum leiða til þess að þessir notendur yrðu jafnsettir og áður. Nú er greinilega komið í ljós að þessir fjármunir eru ekki nægir. Það er á hreinu að iðnaðarnefnd á eftir að vinna mikið í þessari löggjöf á þessu ári og í framtíðinni." Meðalhækkun raforkuverðs RARIK í dreifbýli verður tæp átta prósent, en engin í þéttbýli. Helstu ástæður þessa hækkana er að ekki má lengur selja rafmagn á mismunandi verði eftir því til hvers rafmagnið er notað. Þá felldi Landsvirkjun niður 34 aura verðafslátt nú um áramót, sem kemur til með að hækka rafmagnsverð allra. Kristján Haraldsson, forstjóri Orkubús Vestfjarða segir að breytingar á verðtöxtum verði kynntar í næstu viku, en hjá þeim sem einnig kaupa almennt rafmagn verði nánast engin hækkun á raforkuverði. Tekjur fyrirtækisins munu ekki hækka vegna orkusölu, heldur mun nýtt verð endurspegla tilfærslur á milli taxta.