Skilyrðum til blaðamennsku hrakar á Íslandi

Á lista yfir sjálfstæði og frelsi fjölmiðlunar hrapar Ísland á lista úr 8. í 21. sæti.

Blaðamenn án landamæra gefa reglulega út lista en þar er lagt mat á skilyrði til blaðamennsku að teknu tilliti til ástands í landi hverju, þá einkum að teknu tilliti til tjáningarfrelsis. Ýmsir þættir geta haft þar áhrif á.

Blaðamenn án landamæra gefa reglulega út lista en þar er lagt mat á skilyrði til blaðamennsku að teknu tilliti til ástands í landi hverju, þá einkum að teknu tilliti til tjáningarfrelsis. Ýmsir þættir geta haft þar áhrif á. Í fyrra var Ísland í 8. sæti en hrapar nú niður í það 21 og er ástandið talið ívið betra hér á landi en í Afríkuríkinu Ghana. Í skýrslu sem fylgir kemur fram að Ísland er meðal þeirra landa hvar hrun niður lista er með mestum ósköpum og er talað um að ástæðan sé snarversnandi samskipti fjölmiðla og stjórnmálamanna. Samtökin telja fulla ástæðu til að hafa af þessu áhyggjur að teknu tilliti til þróunar lýðræðis í Vestur-Evrópu allri. Ítalía er einnig meðal þeirra landa þar sem ástandið hefur hríðversnað, og er í því sambandi bent á að blaðamenn megi sæta hótunum frá mafíunni.

Miðað við hin Norðurlöndin er staða Íslands sérstakt áhyggjuefni. Finnar eru efstir á lista, búa við kjöraðstæður. Þar næst kemur Noregur, Danmörk, Holland og Svíþjóð.

Versnandi samskipti við stjórnvöld ættu að hækka okkur á lista

(Uppfært 11:10)

Vísir leitaði viðbragða Hjálmars Jónssonar, formanns Blaðamannafélags Íslands, á þessu mati Blaðamanna án landamæra og hann telur reyndar að ekki hafi orðið grundvallarbreytingar á aðstæðum fjölmiðla og vinnuaðstæðum blaðamanna á síðustu misserum. „Sé ekki hver rökin ættu að vera fyrir því raunar. Samkeppni er mjög hörð á fjölmiðlamarkaði hér á landi og fer harðnandi og mjög mikið af hæfum blaðamönnum sinnir starfi sínu af mikilli samviskusemi þrátt fyrir léleg kjör. Við sjáum enda árangurinn ótvírætt á síðustu mánuðum,“ segir Hjálmar.

Formaðurinn segist ekki vita mikið um þessi samtök né heldur á hverju þau grundvalla mat sitt: „Þau hafa alla vega ekki kallað eftir upplýsingum frá Blaðamannafélagi Íslands. Sýnist raunar á listunum sem birtir eru á heimasíðu samtakanna að við höfum verið í efsta sæti fyrir fáum árum síðan með mest fjölmiðlafrelsi í heiminum. Það segir kannski sína sögu. Sýnist líka að versnandi staða okkar sé rekin til versnandi samskipta blaðamanna og stjórnmálamanna. Hvenær hafa þeir sem sinna þessum störfum verið í sama liði? Þvert á móti er það auðvitað eitt af meginhlutverkum blaðamanna að veita stjórnmálalífinu aðhald, sum sé almannavaldinu. Það er ekki nýtt að stjórnmálamenn kveinki sér undan aðhaldinu og við sjáum á liðnum mánuðum að aðhaldið skilaði árangri, t.a.m. í lekamálinu. Versnandi samskipti fjölmiðla og stjórnmálalífsins, ef það er raunin, ættu því að hækka okkur á listanum frekar en að lækka okkur, hefði ég haldið.“