Slökkviliðsstjóri sakar yfirmenn um einelti

Þorvaldur Helgi Auðunsson, slökkviliðsstjóri á Akureyri, hefur lagt inn kvörtun til Vinnueftirlitsins vegna meints eineltis sem hann telur sig verða fyrir frá öðrum starfsmönnum Akureyrarbæjar. Meintir gerendur í eineltismálinu eru stjórnendur í Ráðhúsi Akureyrarbæjar; bæjartæknifræðingur, starfsmannastjóri bæjarins og bæjarlögmaður.

„Ég get lítið tjáð mig um málið annað en að slökkviliðsstjóri hefur sent inn kvörtun til Vinnueftirlitsins vegna meints eineltis. Ég hef samt sem áður ekki fengið formlega kvörtun í hendurnar,“ segir Eiríkur Björn Björgvinsson, bæjarstjóri á Akureyri. „Nú mun þetta mál fara í sama farveg og sambærileg mál sem berast til sveitarfélagsins.“

Málið er litið alvarlegum augum innan bæjarkerfisins og mun nú fara af stað ferli til þess að leysa úr því. Stutt er síðan núverandi slökkviliðsstjóri tók við störfum þar sem fyrrverandi slökkviliðsstjóra var vikið úr starfi vegna eineltismála. Líklegast verður farin önnur leið að því að leysa mál Þorvaldar Helga, þar sem bæði bæjarlögmaður og starfsmannastjóri bæjarins sitja í eineltisteymi Akureyrarkaupstaðar, sem á að taka á málum sem þessum og vinna úr þeim.

Sóley Björk Stefánsdóttir, bæjarfulltrúi VG á Akureyri, segir þá stöðu sem upp er komin ekki boðlega og alvarlegt að sumir íbúar finni fyrir óöryggi vegna síendurtekinna eineltismála í slökkviliðinu.

„Nú þarf að grípa til aðgerða sem ekki hafa verið notaðar áður. Það er ekki í lagi að eineltismál komi upp í slökkviliðinu svona ítrekað. Ég tel það vera skyldu mína sem bæjarfulltrúa að ganga úr skugga um það að slökkvilið bæjarins sé starfhæft og að íbúar finni ekki fyrir óöryggi. Íbúar verða að sjá að eitthvað verði gert í þessu máli,“ segir Sóley.

Logi Már Einarsson er oddviti Samfylkingar í meirihluta Akureyrarbæjar. Logi segir að fundað verði um málið í dag. „Mér þykir ekki ólíklegt að bæjarstjóri kynni málið fyrir okkur. Ég þekki ekki efnislega til málsins og get ekki tjáð mig um það í sjálfu sér,“ segir Logi. „Hins vegar er ljóst að það eru viðvarandi vandamál á sama vinnustaðnum í ár og áratugi og árekstrar milli starfsmanna, þá hljóta menn að þurfa að skoða starfsemina frá grunni.“