Íslenski boltinn

Guðni Bergs gerir ráð fyrir því að fresta Íslandsmótinu

Óskar Ófeigur Jónsson skrifar
Guðni Bergsson er formaður KSÍ.
Guðni Bergsson er formaður KSÍ. Vísir/Vilhelm

Guðni Bergsson, formaður KSÍ, var gestur Heimis Karlssonar og Gunnlaugs Helgasonar í Bítinu í morgun og þar ræddi hann framhaldið í íslenska fótboltanum.

Heimir Karlsson og Guðni Bergsson þekkjast mjög vel en þeir sáu saman um þátt um ensku úrvalsdeildina og spiluðu líka saman hjá Val og urðu Íslandsmeistarar saman tímabilið 1985.

Heimir spurði Guðna út í Íslandsmótið í knattspyrnu en fyrsti leikur mótsins átti að vera spilaður eftir aðeins rúman mánuð.

„Við erum að ráða ráðum okkar hvað það varðar út af þessu samkomubanni og þessum faraldri sem gengur nú yfir. Við verðum að bregðast við þannig að við erum að fara yfir þetta hjá mótanefndinni og svo á stjórnarfundi á morgun. Ég geri frekar ráð fyrir því að við munum fresta mótinu eitthvað,“ sagði Guðni Bergsson.

Klippa: Bítið - Guðni Bergsson

„Ég held að það sé ráðlegt að fresta mótinu núna þegar við vitum að Evrópumótinu verður frestað í sumar. Það gefur okkur svigrúm og ráðrúm með sumarið,“ sagði Guðni.

Heimir spurði hann þá hvort að það verði leikið þéttar í sumar vegna þessa.

„Við getum frekar fært leiki inn á það tímabil (sem Evrópukeppnin var á) og það gefur okkur svigrúm til að fresta byrjun móts eitthvað fram í maí. Við förum betur yfir þetta en ég á frekar von á því að það verði niðurstaðan hjá okkur,“ sagði Guðni.

Það má heyra allt spjallið hér fyrir ofan.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.