Óttast að atvinnumannadeildin í breska körfuboltanum byrji aldrei aftur

Það er ekki gott hljóðið í forráðamönnum breska körfuboltans og kannski mun verra en hjá mörgum öðrum á þessum tímum kórónuveirunnar.

Staða mála í breska körfuboltanum er samt kannski dæmi um stöðu sem margar deildir í heiminum gæti staðið fyrir eftir að þær missa af hápunkti tímabilsins síns þar sem stór hluti af tekjum þeirra kemur inn.

Telegraph hefur eftir heimildarmanni sínum innan breska körfuboltans að menn þar á bæ óttist það atvinnumannadeildin heyri sögunni til eftir þetta áfall.

Ellefu félög spila í bresku atvinnumannadeildinni sem er mun minni í sniðum heldur en fótbolta- eða rúgbý deildirnar í Englandi.

Forráðamenn deildarinnar aflýstu henni í dag en þeir eru mun seinna á ferð en flestar deildir í Evrópu.

„Við getum ekki komist hjá því að aflýsa deildinni en menn óttast það að hún byrji aldrei aftur. Það er erfitt að sjá fyrir sér kringumstæður þar sem deildin geti byrjað aftur í september,“ hefur eftir heimildarmanni sínum innan breska körfuboltans.

Breski körfuboltinn þarf líklega á stuðningi frá breskum stjórnvöldum ætli hann að lifa af þessa krepputíma en það er ekki líklegt að hann sé ofarlega á lista.

Hér er lykilatriðið að breska körfuboltadeildin treystir aðallega á innkomu á leikjum í formi sölu aðgöngumiða og veitinga á leikstað. Þar eru engar sjónvarpstekjur eins og í fótboltanum eða rúgbý.