Salah búinn að ná Cristiano Ronaldo

Mohamed Salah er nú búinn að skora jafnmörg mörk og Cristiano Ronaldo gerði fyrir Manchester United á sínum tíma.

Salah skoraði 84. markið í gær í sínum 131. leik en hann var 65 leikjum á undan Ronaldo að skora sín 84 mörk. Cristiano Ronaldo lék 196 deildarleiki fyrir Manchester United á árunum 2003 til 2009.

Salah kom til Liverpool frá Roma sumarið 2017 og hefur síðan tvisvar fengið gullskóinn sem markakóngur ensku úrvalsdeildarinnar (2017/18 og 2018/19). Salah hafði áður skoraði 2 mörk í 13 deildarleikjum með Chelsea frá 2013 til 2014.

Mo Salah lagði einnig upp mark Joel Matip í leiknum á móti Úlfunum og er því einnig kominn með 31 stoðsendingu í ensku úrvalsdeildinni. Salah hefur því komið með beinum hætti að 115 mörkum í deildinni.

Salah nálgast nú einnig Afríkumet Didier Drogba. Drogba er sá afríski knattspyrnumaður sem hefur skorað mest í ensku úrvalsdeildinni eða alls 104 mörk. Það met fellur þó örugglega aldrei fyrr en á næsta tímabili í fyrsta lagi.