HSÍ syrgir ein­stakan stuðnings­mann

Sævar var afi Arnars Freys Arnarssonar og studdi því sérstaklega við línumanninn öfluga en einnig við alla strákana okkar.

„Það er skarð fyrir skildi í stúkunni. Frá árinu 2015 fylgdi Sævar Þór Sigurgeirsson íslensku landsliðunum í handbolta á stórmót, bæði yngri landsliðunum og A-landsliðinu. Hann var löngu orðinn fastur og kær hluti af þeim hópi sem fylgir liðunum okkar út í heim,“ segir í kveðju á Facebook-síðu HSÍ þar sem Sævars er minnst.

Þar segir að Sævar, sem var frá Skeggjastöðum í Miðfirði, hafi byrjað á að fylgja Arnari á mót með yngri landsliðum og haldið því áfram þegar Arnar var kominn í A-landsliðið.

„Fáir hafa fylgt ferli eins leikmanns jafn dyggilega og Sævar fylgdi ferli Arnars. Stoltið leyndi sér aldrei, en stuðningur hans náði til alls liðsins.“

Útför Sævars fer fram frá Háteigskirkju á morgun, fimmtudag, klukkan 13.

„Handboltahreyfingin á Íslandi þakkar Sævari tryggðina og stuðninginn í gegnum árin. Við sendum Arnari Frey og allri fjölskyldu Sævars innilegar samúðarkveðjur,“ segir í kveðju HSÍ.

Næsta stórmót strákanna okkar er heimsmeistaramótið í Þýskalandi í janúar næstkomandi. Þar byrjar Ísland á leik við Barein 15. janúar í Magdeburg og mætir svo Japan og Norður-Makedóníu áður en keppni í milliriðlum tekur við í Hannover.