Tónlist

Mugison nýr rokkstjóri Aldrei fór ég suður

Sunna Kristín Hilmarsdóttir skrifar
Örn Elías Guðmundsson, betur þekktur sem Mugison, er nýr rokkstjóri Aldrei fór ég suður.
Örn Elías Guðmundsson, betur þekktur sem Mugison, er nýr rokkstjóri Aldrei fór ég suður. Aldrei fór ég suður

Tónlistarmaðurinn Örn Elías Guðmundsson, betur þekktur sem Mugison, hefur verið ráðinn sem næsti rokkstjóri tónlistarhátíðarinnar Aldrei fór ég suður sem haldin er um páskana ár hvert á Ísafirði.

Þetta kemur fram í tilkynningu frá hátíðinni. Mugison tekur við keflinu af Kristjáni Frey sem hefur verið rokkstjóri undanfarin fjögur ár.

Mugison er einn þeirra sem efndu til fyrstu tónlistarveislunnar undir merkjum Aldrei fór ég suður árið 2004. Hátíðin fagnar því sautján ára afmælinu næsta vor þegar 18. hátíðin fer fram.

„Aldrei fór ég suður var haldin með óhefðbundnu sniði í ár vegna heimsfaraldursins en þótti hátíðarhöldurum takast vel til að bregðast við aðstæðum og búa til skemmtilega dagskrá sem landsmenn gátu fylgst með heim í stofu. Á hátíðinni í ár komu fram um tuttugu hljómsveitir, tónlistarkonur og -menn úr ýmsum áttum.

Helgast hátíðin einna helst að því að teflt er fram landsþekktu tónlistarfólki í bland við hæfileikafólk heiman úr héraði og hafa rúmlega 400 tónlistaratriði stigið á stokk fyrir vestan um páskana frá upphafsárinu. Meðal þeirra sem komu fram í ár og buðu upp á ógleymanleg framlög voru Eivör, Moses Hightower, Snorri Helga og Saga Garðars, Dóra Wonder, Lay Low og Árný Margrét.

Fráfarandi rokkstjórinn Kristján Freyr hefur verið ráðinn sem framkvæmdastjóri Íslensku tónlistarverðlaunanna og mun einnig sjá um dagskrá í tilefni Dags íslenskrar tónlistar sem verður 1. desember næstkomandi.

Kristján Freyr mun þó áfram starfa við hlið nýs rokkstjóra, innan Aldrei fór ég suður nefndarinnar, ásamt rokkstjórum fyrri ára og góðum hópi vestfirsks ástríðufólks um tónlistarmenningu. Rokkstjórn Aldrei fór ég suður vill nota tækifærið og þakka Kristjáni Frey fyrir ómetanlegt og óeigingjarnt framlag til hátíðarinnar og um leið óska honum velfarnaðar á nýjum vettvangi,“ segir í tilkynningu.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.