Fótbolti

Tjón upp á 400 milljónir og Þjóðhátíðina

Sindri Sverrisson skrifar
Það var dýrt fyrir knattspyrnufélögin í sumar að geta ekki tekið við sama áhorfendafjölda og venjulega á leikjum, vegna samkomutakmarkana.
Það var dýrt fyrir knattspyrnufélögin í sumar að geta ekki tekið við sama áhorfendafjölda og venjulega á leikjum, vegna samkomutakmarkana. vísir/hulda margrét

Félögin í efstu tveimur deildum fótboltans á Íslandi urðu af um hálfum milljarði, hið minnsta, í sumar vegna kórónuveirufaraldursins. Stjórnvöld kynna brátt aðgerðir sem meðal annars eru ætlaðar til að bæta tjónið, að minnsta kosti að hluta.

Íslenskur toppfótbolti, hagsmunasamtök félaganna í efstu tveimur deildum karla í fótbolta, tók saman áætlað tekjufall sinna aðildarfélaga í sumar vegna samkomutakmarkana. Félögin misstu af tekjum af miða- og veitingasölu á leikjum, og af ýmiss konar viðburðahaldi og yngri flokka mótum. Ekki er tekið tillit til skertra samninga við fyrirtæki.

Eftir að svör höfðu fengist frá 20 félögum nam heildarupphæðin um 400 milljónum króna. Þá hafði þó ekki borist svar frá ÍBV en ljóst er að Eyjamenn urðu af tugum milljóna króna þar sem að ekki var haldin Þjóðhátíð í ár. Sú upphæð skiptist þó á fleiri deildir félagsins en knattspyrnudeildina.

Aðgerðir vegna tekjufalls frá fyrsta júní

Stjórnvöld boðuðu um helgina „umfangsmiklar stuðningsaðgerðir“ við íþróttastarf í landinu. Í þeim felst að íþróttafélög geti sótt um styrki vegna launa- og verktakagreiðslna frá og með 1. október síðastliðnum, og sérstaka styrki vegna tekjufalls frá 1. júní til 1. október. Endanleg útfærsla aðgerðanna ætti að liggja fyrir í næstu viku.

Ljóst er að ÍBV varð af mjög háum tekjum vegna þess að samkomutakmarkanir komu í veg fyrir að Þjóðhátíð væri haldin í Vestmannaeyjum.vísir/elín björg

Birgir Jóhannsson, framkvæmdastjóri Íslensks toppfótbolta, segir boðaðar aðgerðir kærkomnar:

„Við erum ánægð með þessar fréttir og vongóð um að þetta nýtist félögunum vel. Núna er verið að vinna við að teikna upp ástandið, taka saman þau gögn sem þarf, og sjá til þess að þessi stuðningur nái til íþróttafélaganna eins og hugsunin er.“

Búið að útdeila 450 milljónum vegna vormánaða

Áður hafa stjórnvöld veitt 450 milljónum króna til íþróttahreyfingarinnar vegna þeirra fjárhagsvandræða sem faraldurinn olli í vor. Þar af var 300 milljónum deilt á milli félaga eftir iðkendafjölda á aldrinum 6-18 ára, en 150 milljónum útdeilt vegna tekjumissis tengdum leikjum og viðburðum sem ekki mátti halda frá 1. mars til 1. júní. Þannig var til að mynda handknattleiks- og körfuboltadeildum að einhverju leyti bætt tjónið sem af því hlaust að engin úrslitakeppni væri í greinunum í vor.

Nýju aðgerðirnar taka til þess fjögurra mánaða tímabils sem tók við eftir 1. júní, fótboltavertíðarinnar sem bar þess svo sannarlega keim að smitfaraldur geisaði í heiminum. Birgir bindur vonir við að aðgerðir stjórnvalda hjálpi félögum að halda sjó eftir sumarið:

„Við vonum það og að auðveldara verði fyrir félögin að fara inn í þennan vetur, þegar við vitum að enn þarf að búa við þessar sóttvarnaaðgerðir og að reksturinn þyngist hjá þeim fyrirtækjum sem félögin lifa á með auglýsingasamningum og þess háttar. Þetta mun hjálpa til við að komast í gegnum þennan vetur, og vinna til baka tekjur sem töpuðust í sumar.“


Tengdar fréttir

Um­fangs­miklar stuðnings­að­gerðir í bí­gerð

Ríkisstjórn Íslands samþykkti á fundi sínum í gær tillögu þess efnis að ráðist verði í aðgerðir til að koma til móts við íþrótta- og æskulýðsfélögum landsins vegna þeirrar röskunar sem Covid-19 faraldurinn hefur haft á starf þeirra.

Félögin ráðstafa peningunum frá ÍSÍ eftir eigin höfði

Guðmundur Gunnarsson, framkvæmdarstjóri Fjölnis, segir að félögin geti ráðstafað peningnum frá ÍSÍ eins og þau vilja en Fjölnir var það íþróttafélag sem fékk hæsta styrkinn frá ÍSÍ vegna áhrifa COVID-19.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.