Íslenski boltinn

Dagný skoraði þrennuna á öðrum fæti: Þreytandi að geta ekki leikið við son minn vegna verkja

Sindri Sverrisson skrifar
Dagný Brynjarsdóttir skoraði tvö skallamörk og eitt með vinstri fæti í sigrinum gegn Lettlandi.
Dagný Brynjarsdóttir skoraði tvö skallamörk og eitt með vinstri fæti í sigrinum gegn Lettlandi. vísir/vilhelm

Dagný Brynjarsdóttir skoraði sína fyrstu þrennu á ferlinum þegar hún gat ekki notað hægri fótinn vegna meiðsla. Hún píndi sig í gegnum leikinn mikilvæga við Svíþjóð en gæti misst af næsta leik við sænska liðið.

Ísland vann 9-0 stórsigur gegn Lettlandi 17. september og gerði 1-1 jafntefli við HM-bronslið Svía fimm dögum síðar. Dagný lék báða leiki þrátt fyrir að hafa meiðst illa í fæti í leik með Selfossi gegn Val 9. september.

„Ég fékk leikmann aftan á hælinn þegar ég var að hlaupa, með tábergið niðri í grasinu, svo ristin á mér kramdist,“ segir Dagný.

Ef ég hefði skotið með hægri hefði ég þurft skiptingu

Hún gat lítið sem ekkert æft fyrir landsleikina, fékk verkjalyf og hlífði hægri fætinum eins og hún gat, en skoraði samt þrjú mörk gegn Lettum og lék einnig mjög vel gegn Svíum.

„Ég er með töluverðan beinbjúg í nokkrum beinum; í tveimur ökklabeinum og í hluta af aðlægum ristarbeinum. Ég viðurkenni að það er orðið svolítið þreytandi að geta ekki leikið við son minn á daginn því mér er svo illt í fætinum. Daglegt amstur er búið að vera bras,“ segir Dagný sem hefur verið með hækjur síðustu vikuna og reynt að hlífa fætinum.

Dagný í skallabaráttu í leiknum mikilvæga við Svía.vísir/vilhelm

En hvernig var þá að spila landsleikina? „Stundum skil ég ekki hvernig ég geri þetta. Ég fékk bara verkjatöflur og svo var mér bara ógeðslega illt dagana eftir leikina. Ég er svo búin að vera á hækjum og í spelku.“

Dagný skoraði þrennuna sína gegn Lettum með vinstri fæti og höfðinu, en tvö markanna voru skallamörk. Henni var svo skipt af velli í hálfleik en hún lék allan leikinn gegn Svíum.

Klippa: Ísland 9-0 Lettland

„Það er vont að stíga í fótinn og glöggir menn hefðu getað séð hvað ég notaði hægri fótinn lítið. Alltaf þegar ég kom mér í færi þá notaði ég vinstri fótinn. Ef ég hefði skotið með hægri hefði ég jafnvel þurft skiptingu. Adrenalínið og verkjatöflurnar hjálpa manni í gegnum þetta.“

Dagný fagnar marki í stórsigrinum gegn Lettum.vísir/vilhelm

Ljóst var eftir landsleikina að Dagný þyrfti hvíld en hún lét undan pressu frá Alfreð Elías Jóhannssyni, þjálfara Selfoss, og spilaði í 2-1 sigri Selfoss gegn KR 30. september. Síðan þá hefur hún hvílt sig og reynt að fá bót meina sinna.

Gæti misst af Gautaborgarför

Dagný bíður nú eftir nýjum niðurstöðum frá bæklunarlækni og það ætti að skýrast um helgina hvort hún geti leikið með Íslandi í Gautaborg eftir ellefu daga. Jafnteflið við Svíþjóð á Laugardalsvelli í síðasta mánuði þýðir að Ísland á fína möguleika á að komast beint á EM en undankeppninni lýkur 1. desember með leikjum við Slóvakíu og Ungverjaland.

Hún vonast til að fá góðar fréttir frá lækninum en viðurkennir þó að leikurinn í Gautaborg komi kannski of snemma:

„Það er kannski ekki sniðugt að vera búin að hvíla sig í tvær vikur og klúðra bataferlinu með því að spila gegn Svíum. Þó að það sé stórleikur þá er hann það ekki nema að við vinnum líka hina tvo leikina í lok nóvember og þá vil ég spila.“


Tengdar fréttir

Vorsabæjarfrænkurnar með fimm mörk

Íslenska kvennalandsliðið í knattspyrnu skoraði níu mörk gegn Lettlandi á Laugardalsvelli í gær. Fimm markanna komu frá frænkum í liðinu.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.