Bayern sagt ætla að bjóða 75 milljónir punda í Bobby

Það gæti verið freistandi fyrir Liverpool að selja Roberto Firmino í sumar ef marka má fréttir í ensku slúðurblöðunum í morgun.

Bayern München á nefnilega að vera að setja saman 75 milljón punda tilboð í Roberto Firmino í sumar og þýska stórliðið ætlar sér líka að ná í Leroy Sane hjá Manchester City. Þetta kemur fram í fréttum blaða í morgun.

Ensku miðlarnir hafa verið duglegir að fjalla um áhuga evrópskra stórliða á mönnum eins og Mohamed Salah og Sadio Mané en hugsanleg kaup Firmino hafa ekki verið mikið á síðum þeirra.

Það verður mjög fróðlegt að fylgjast með því hvort að Jürgen Klopp sé tilbúinn að láta einhvern fara úr þessari mögnuðu sóknarþrennu sinni.

Bayern Munich are reportedly preparing a £75m bid for Liverpool forward Roberto Firmino.

The gossip https://t.co/PnqwqO2WKo#bbcfootballpic.twitter.com/NMM510BpaF

— BBC Sport (@BBCSport) February 10, 2020

Roberto Firmino er samt orðinn 28 ára gamall og 75 milljónir punda er mikill peningur.

Firmino myndi spila í framlínu Bayern með hinum 32 ára gamla Robert Lewandowski. Hans-Dieter Flick, knattspyrnustjóri Bayern München, hefur mikla trú á að samvinna þessara tveggja leikmanna myndi slá í gegn.

Firmino gæti verið á tímamótum í sumar ætli Jürgen Klopp að kaupa menn eins og hinn 23 ára gamla Timo Werner.

Klopp gerir sér hins vegar væntanlega betur grein fyrir mikilvægi Roberto Firmino en flestir aðrir. Bobby er mjög vinnusamur og óeigingjarn leikmaður sem hefur einnig gæðin til að gera útslagið á úrslitastundum sem hann hefur gert svo oft.

Á þessu tímabili hefur Roberto Firmino skorað öll mörkin sín á útivelli en hann hefur skorað nokkur sigurmörk þar á meðal í undanúrslitaleik og úrslitaleik heimsmeistarakeppni félagsliða.

Roberto Firmino er alls með 8 mörk og 7 stoðsendingar í 25 leikjum í ensku úrvalsdeildinni á þessari leiktíð en í fyrravetur var hann með 12 mörk og 7 stoðsendingar í 34 leikjum.

Liverpool keypti Roberto Firmino frá Hoffenheim árið 2015 fyrir 29 milljónir punda en hann skrifaði síðast undir samning í apríl 2018 en sá samningur nær til 30. júní 2023.