Göngu­æði grípur landann og met­að­sókn hjá Ferða­fé­lagi Ís­lands

Gríðarleg aðsókn hefur verið í gönguferðir á hálendi Íslands í sumar og má segja að gönguæði hafi gripið þjóðina. Sjaldan hafa jafn margar myndir af hálendi landsins prýtt samfélagsmiðla en aðsókn í göngur hefur stóraukist bæði hjá Íslenskum fjallaleiðsögumönnum og hjá Ferðafélagi Íslands, sem bæði sjá um að skipuleggja ferðir um náttúru landsins.

Að sögn Elínar Sigurveigar Sigurðardóttur hjá Íslenskum fjallaleiðsögumönnum hafa gönguferðir yfir Fimmvörðuháls og fjórhjólaferðir verið vinsælastar. Mest aðsókn sé í dagsferðir hjá félaginu en í lengri ferðir sé aðsóknin hins vegar svipuð og síðustu ár.

Annað er þó uppi hjá Ferðafélagi Íslands en aðsóknin í ferðir félagsins og skráningar í félagið hefur aldrei verið meiri í 93 ára sögu félagsins að sögn Páls Guðmundssonar, framkvæmdastjóra félagsins.

„Þátttakan hefur aldrei verið meiri. Það er metaðsókn í allar ferðir hjá okkur og þær eru meira og minna allar uppseldar og við höfum bætt við sem nemur um 30 prósent af ferðum í ferðaáætlun félagsins. Þær hafa líka selst upp og runnið út,“ segir Páll. Hann segir jafnframt að nærri þúsund nýir félagar hafi skráð sig í félagið síðustu sex til átta vikurnar. Fjöldi félagsmanna fari að nálgast tíu þúsund en aldrei hafi jafn margir verið skráðir í félagið.

Ein af jákvæðari hliðum Covid-ástandsins

„Það er gríðarlega mikill áhugi á ferðum og til að mynda er helgina sem er fram undan, og mitt inn í þessa veðurspá sem er ekki mjög góð fyrir ferðir bæði Norðanlands, vestanlands og uppi á hálendi, þá erum við með einar tólf til fimmtán ferðir sem eru að fara af stað næstu daga. Þær eru allar vel- eða fullbókaðar.“

„Þetta er mjög ánægjulegt og gaman að sjá. Þetta er það svið sem Ferðafélagið starfar á, er að kynna landið fyrir Íslendingum. Þetta er kannski ein af jákvæðari hliðum af þessu Covid-ástandi,“ segir Páll.

Hann segir eiginlega alla þá sem fara í göngur hjá félaginu Íslendinga eða aðila sem búsettir eru hér á landi. Lítið sé um ferðamenn og þeim sé alla jafnan vísað á ferðaskrifstofur. „Ferðafélag Íslands er áhugamannafélag sem hefur það að markmiði að kynna landið fyrir Íslendingum.“

Ferðirnar jafn fjölbreyttar og þær eru margar

Ferðirnar sem boðið er upp á hjá félaginu eru mjög fjölbreyttar, bæði hvað erfiðleikastigið varðar og hvar þær eru. „Þetta er allt frá ferðum hér um göngustíga í þéttbýli og nágrenni yfir á hæstu tinda landsins og yfir á fjögurra skóa erfiðar ferðir um óbyggðir þar sem fólk er jafnvel með allt á bakinu í fimm daga,“ segir Páll en erfiðleikastig ferðanna er flokkað eftir „gönguskóm“ – það er ferðirnar eru flokkaðar í fjögur erfiðleikastig frá einum skó upp í fjóra, einn er léttastur og fjórir erfiðastur.

„Þetta er mjög breiður hópur af fólki sem við erum að tala við og úrvalið af ferðum er mikið. Við erum að fara í dagsferðir, kvöldferðir, helgarferðir og svo sumarleyfisferðir,“ segir Páll.

Hann segir starfið hjá félaginu hafa aukist mikið á síðustu fimmtán árum en aðsókn hafi aukist ár hvert og stöðugur vöxtur verið í aðsókn. „Þá hefur verið stöðugur vöxtur og aukin þátttaka þá meðal annars ekki síst í svokölluðum fjallaverkefnum sem félagið hefur boðið upp á síðastliðin tíu ár. Þar er stór hópur, hátt í fimm- sex hundruð manns sem eru beinlínis áskrifendur að fjallgöngum.“

Fór úr því að vera tíska yfir í að vera lífsstíll

Páll segir það auðséð að þátttakan hafi breyst úr því að vera tíska yfir í það að verða að „lífstílsbreytingu,“ eins og hann kallar það. „Á tímabili fundum við að það var í tísku að fara kannski eina góða sumarleyfisferð á ári hjá ákveðnum hópum,“ segir Páll og segir breytinguna mjög ánægjulega. „Það er mjög ánægjulegt að sjá það og samtímis höfum við bæði meðvitað og ómeðvitað séð breytingar á þátttakendum hjá okkur.“

Jafnframt hafi hópurinn yngst töluvert síðustu fimmtán árin. Meðalaldurinn hafi verið í kring um 55 til 60 ára en nú sé hann kominn niður í 45 ár og þá tekur hann ekki inn í félagsmenn í Ferðafélagi barnanna og Ferðafélagi unga fólksins. Þá séu konur einnig í meirihluta.

„Þær eru um sextíu prósent af öllum þátttakendum í ferðum félagsins. Konur eru almennt meira umhverfisvænar í sínum gildum í lífinu og hafa áhuga á bæði núvitund, náttúrunni og útiveru. Þetta virðast vera gildi sem eru ofar hjá konum en hjá körlum og kannski ekki óvænt að þær séu í meirihluta hjá okkur,“ segir Páll.

„Þetta er allt saman mjög ánægjulegt og skemmtilegar tölur og gaman að sjá þennan mikla áhuga.“