Íslenski boltinn

FH tapað öllum leikjunum gegn Breiðabliki síðan Ólafur tók við

Ingvi Þór Sæmundsson skrifar
Ólafi hefur ekki gengið vel gegn sínu gamla félagi, Breiðabliki, síðan hann kom aftur heim og tók við FH.
Ólafi hefur ekki gengið vel gegn sínu gamla félagi, Breiðabliki, síðan hann kom aftur heim og tók við FH. vísir/hag

Frá því Ólafur Kristjánsson tók við FH fyrir tímabilið 2018 hefur liðið tapað öllum fjórum deildarleikjum sínum gegn Breiðabliki, liðinu sem hann þjálfaði á árunum 2006-14 og gerði að Íslands- og bikarmeisturum. FH sækir Breiðablik heim í stórleik 5. umferðar Pepsi Max-deildar karla í kvöld.

Í þremur af þessum fjórum deildarleikjum gegn Breiðabliki síðan 2018 hefur FH fengið á sig fjögur mörk. Markatalan er 15-5, Blikum í hag.

Ólafur kom heim frá Danmörku haustið 2017 og tók við FH af Heimi Guðjónssyni. Í 2. umferð Pepsi-deildarinnar 2018 mætti FH Breiðabliki í Kaplakrika og tapaði, 1-3. Gísli Eyjólfsson, Elfar Freyr Helgason og Jonathan Hendrickx, fyrrverandi leikmaður FH, skoruðu mörk Breiðabliks. Steven Lennon lagaði stöðuna fyrir FH.

Liðin mættust aftur á Kópavogsvelli í 13. umferðinni 2018. Thomas Mikkelsen kom Blikum yfir en Robbie Crawford jafnaði fyrir FH-inga. 

Breiðablik tryggði sér svo sigurinn með því að skora þrjú mörk á tíu mínútna kafla undir lok leiks. Þau gerðu Davíð Kristján Ólafsson, Gísli og Arnór Gauti Ragnarsson. Lokatölur 4-1, Breiðabliki.

Sömu lokatölur urðu í fyrri deildarleik liðanna á síðasta tímabili. Aron Bjarnason skoraði þá tvö mörk og Andri Rafn Yeoman og Mikkelsen sitt markið hvor. Brynjar Ásgeir Guðmundsson gerði mark FH.

Í seinni deildarleiknum í fyrra byrjuðu FH-ingar af gríðarlegum krafti og eftir sautján mínútur voru þeir 2-0 yfir. Lennon og Atli Guðnason skoruðu mörkin. Viktor Örn Margeirsson minnkaði muninn í 2-1 á 23. mínútu sem voru hálfleikstölur.

Í upphafi seinni hálfleiks var Davíð Þór Viðarsson rekinn af velli. Blikar gengu á lagið og skoruðu þrjú mörk á fimmtán mínútna kafla. Mikkelsen gerði tvö þeirra og Höskuldur Gunnlaugsson eitt. Í þremur deildarleikjum gegn FH hefur Mikkelsen skorað fjögur mörk.

Breiðablik er á toppi Pepsi Max-deildarinnar með tíu stig. FH, sem hefur leikið einum leik færra, er í 7. sætinu með sex stig.

Leikur Breiðabliks og FH hefst klukkan 20:15 og verður sýndur beint á Stöð 2 Sport. Farið verður yfir leikinn og hina þrjá leikina sem fara fram í kvöld í Pepsi Max tilþrifunum sem hefjast strax eftir leikinn á Kópavogsvelli.




Fleiri fréttir

Sjá meira


×