Sport

Bestu íþróttamyndir síðari ára

Runólfur Trausti Þórhallsson skrifar
Ein frægasta senan í Rocky er þegar hann hleypur upp tröppurnar fyrir framan listasafnið í Philadelphia.
Ein frægasta senan í Rocky er þegar hann hleypur upp tröppurnar fyrir framan listasafnið í Philadelphia. Allstar/MGM/Sportsphoto

Þar sem fáir íþróttaviðburðir eru á dagskrá þessa dagana þá er um að gera að nýta tímann í að horfa á sumar af bestu íþróttamyndum allra tíma. Hér að neðan er listi af eftirminnilegustu íþróttamyndum sem undirritaður hefur séð á lífsleiðinni.

Engir þættir né heimildamyndir eru á listanum en sjónvarpsefni á borð við Sunderland ´Til I die og Icarus ættu einnig að vera skylduáhorf.

Rocky (1976)

Einkunn á IMDB: 8.1

Aðalhlutverk: Sylvester Stallone

Íþrótt: Hnefaleikar 

Rocky er af mörgum talin ein besta íþróttamynd allra tíma. Myndin skaut Sylvester Stallone upp á stjörnuhimininn en hann skrifaði handritið ásamt því að leika aðalhlutverið. Hlutverk sem hann er enn að leika í myndunum Creed [meira um þær hér að neðan].

Rocky er hin fullkomna Davíð gegn Golíat saga og sýnir að allt sem maður þarf er tækifæri til að láta ljós sitt skína. Bardagaatriði myndarinnar geta verið kómísk á köflum en myndin er samt sem áður frábær. 

Alls urðu Rocky myndirnar sex talsins og fyrstu þrjár eru allar þess virði að sjá. Hinar þrjár, eru ágætar ef fólk hefur ekkert betra að gera.

Creed (2015)

Einkunn á IMDB: 7.6

Aðalhlutverk: Michael B. Jordan og Sylvester Stallone

Íþrótt: Hnefaleikar

Segja má að Creed sé sjálfstætt framhald af Rocky myndunum frekar en hluti af þeim. Hér kynnumst við Adonis Johnson, syni Apollo Creed. Hann á í vandræðum með að fóta sig í lífinu og þar kemur Rocky, vinur föður hans, inn í myndina. 

Myndin gerist í Philadelphia líkt og Rocky og svipar mjög til fyrstu Rocky myndarinnar. Myndin er einkar vel leikin og bardagaatriði myndarinnar eru einkar vel útfærð. Enda voru sum þeirra ekki leikin og Michael B. Jordan var nánast sleginn í rot við að leika í myndinni, eitthvað sem Stallone sannfærði hann um að gera.

Million Dollar Baby (2004)

Einkunn á IMDB: 8.1

Aðalhlutverk: Hilary Swank, Clint Eastwood og Morgan Freeman

Íþrótt: Hnefaleikar

Rosaleg mynd um Maggie Fitzgerald (Hilary Swank) og það sem hún leggur á sig til að gera hnefaleika að atvinnu sinni. Blóð, sviti og tár.

Myndin hlaut fjögur Óskarsverðlaun, þar á meðal fyrir bestu mynd. Þá fengu bæði Swank og Freeman Óskar fyrir leik sinn.

The Fighter (2010)

Einkunn á IMDB: 7.8

Aðalhlutverk: Mark Wahlberg, Christian Bale og Amy Adams

Íþrótt: Hnefaleikar

Enn ein myndin sem snýst um hnefaleika en þessi er sannsöguleg. Hún fjallar um bræðurnar Micky Ward (Mark Wahlberg) og Dicky Eklund (Christian Bale) sem voru báðir mjög efnilegir hnefaleikamenn.

Dicky tókst ekki að nýta sitt tækifæri og er nú þjálfari Micky. Hann, líkt og öll fjölskylda þeirra, er í raun að halda Micky frá því að fullnýta hæfileika sína. Ef ekki hefði verið fyrir Charlene Fleming (Amy Adams) hefði Micky eflaust aldrei fengið tækifæri til þess að sýna hvað hann getur.

I, Tonya (2017)

Einkunn á IMDB: 7.5

Aðalhlutverk: Margot Robbie og Sebastian Stan

Íþrótt: Skautar

Sannsöguleg mynd byggð á ævi Tonya Harding sem var vægast sagt engin dans á rósum. Ofbeldisfull móðir, ofbeldisfullur eiginmaður. Rosaleg saga sem oft á tíðum er erfitt að trúa að sé sannsöguleg.

Any Given Sunday (1999)

Einkunn á IMDB: 6.9

Aðalhlutverk: Al Pacino, Cameron Diaz og Jamie Foxx

Íþrótt: Bandarískur fótbolti (NFL)

Mynd eftir Oliver Stone sem sýnir frá vandræðum Miami Sharks innan vallar sem utan. Liðið er í harðri baráttu um að komast í úrslitakeppni NFL-deildarinnar þegar aðalleikstjórnandi liðsins  sem og vara leikstjórnandinn meiðast í einum og sama leiknum. 

Jamie Foxx, sem er á þeim tíma þriðji kostur, kemur inn í liðið og spilar stórkostlega.

Barátta Christinu Pagniacci (Cameron Diaz), eiganda liðsins, við borgaryfirvöld og Tony D‘Amato (Al Pacino), þjálfara liðsins, spila einnig stóra rullu. Frægust er myndin þó eflaust fyrir stórbrotna ræðu Al Pacino. Það er hægt að bóka að allir sem hlusta fái gæsahúð.

The Wrestler (2008)

Einkunn á IMDB: 7.9

Aðalhlutverk: Mickey Rourke

Íþrótt: Fjölbragðaglíma

Randy Robinson (Mickey Rourke) hefur haft það betra þar sem ferill hans sem fjölbragðaglímukappi er á enda. Hann er kominn á endastöð og er algjörlega stefnulaus.

Micky Rourke leikur hinn andlega og líkamlega þreytta Robinson fullkomlega enda Rourke farið í gegnum að sama á sínum ferli sem leikari. Þá er vert að minnast á lag myndarinnar sem ber sama heiti og myndin eftir Bruce Springsteen, lagið hlaut Golden Globe verðlaun.

Warrior (2011)

Einkunn á IMDB: 8.2

Aðalhlutverk: Tom Hardy, Nick Nolte og Joel Edgerton

Íþrótt: Mixed Martial Arts (MMA)

Þeir Tommy Conlon (Tom Hardy) og Brendan Conlon (Joel Edgerton) eru bræður sem hafa ekki talað saman í fleiri ár. Faðir þeirra (Nick Nolte) er fyrrum alkahólisti sem endar á því að þjálfa Tommy fyrir keppni þar sem verðlaunaféð er nægilega mikið til að umturna lífi þeirra. 

Brendan skráir sig í sömu keppni og því líkur á að bræður munu berjast. Á pappír hljómar myndin eins og ágætis klisja en þeir Hardy, Edgerton og Nolte fara einfaldlega á kostum og lokaatriði myndarinnar er líklegt til að græta jafnvel mestu harðhausa.

Í raun hin fullkomna „sunnudagsmynd.“

Moneyball (2011)

Einkunn á IMDB: 7.6

Aðalhlutverk: Brad Pitt og Jonah Hill

Íþrótt: Hafnabolti

Sannsöguleg mynd um Billy Beane (Brad Pitt) framkvæmdastjóra Oakland A´s og tilrauna hans til að koma liðinu í fremstu röð. Það reynist erfitt þar sem liðið hefur ekkert í líkingu við það fjármagn sem helstu keppinautar þess hafa.

Þegar Billy hittir Peter Brand (Jonah Hill) þá fær hann nýja sýn á hafnabolta. Sú sýn reyndist í kjöflarið umturna hafnabolta yfir höfuð og hafa nú flest lið í MLB-deildinni í hafnabolta tekið upp sama kerfi og þeir Beane og Brand komu upp hjá Oakland A´s.

Happy Gilmore (1996)

Einkunn á IMDB: 7.0

Aðalhlutverk: Adam Sandler

Íþrótt: Golf

Adam Sandler, þegar hann var ennþá fyndinn, fer á kostum sem Happy Gilmore. Takmarkaður kylfingur með alltof stórt skap. Þarf að segja eitthvað meira?

The Hurricane (1999)

Einkunn á IMDB: 7.6

Aðalhlutverk: Denzel Washington

Íþrótt: Hnefaleikar

Sannsöguleg mynd um sögu Robin „Hurricane“ Carter, boxara sem var ranglega dæmdur fyrir morð. Sat hann í fangelsi í 20 ár áður en var sleppt eftir að sýnt var fram á að engar sannanir hefðu verið fyrir dómnum.

Lagið „Hurricane“ eftir Bob Dylan frá árinu 1975 fjallar einnig um málið.

He Got Game (1998)

Einkunn á IMDB: 6.9

Aðalhlutverk: Denzel Washington og Ray Allen

Íþrótt: Körfubolti

Aftur er Denzel með stórleik en hann leikur Jake Shuttleworth, ofbeldisfullan faðir sem á erfitt með að sætta sig við hlutskipti sín í lífinu. Sonur hans, Jesus Shuttleworth er leikinn af Ray Allen sem átti einkar farsælan feril í NBA-deildinni frá 1996 til 2014.

Jesus er efnilegur körfuboltamaður og er að reyna taka ákvörðun um framtíð sína en faðir hans gerir honum erfitt fyrir. Skammarlegt að myndin fái aðeins 6.9 í einkunn en hún eldist mjög vel og er auðvelt að mætla með henni við alla sem elska góðar körfuboltamyndir.

Coach Carter (2005)

Einkunn á IMDB: 7.3

Aðalhlutverk: Samuel L. Jackson, Channing Tatum og fleiri

Íþrótt: Körfubolti

Ken Carter tekur við skólaliði Richmond og reynir að kenna drengjunum þar hvernig á að haga sér innan vallar sem utan. Myndin er byggð á sannri sögu en Carter var fyrrum nemandi sem og besti leikmaður í sögu skólans. Það er áður en sonur hans mætti á svæðið.

Myndin gefur ágætis innsýn inn í líf nemenda í skóla á borð við Richmond en það verður seint hægt að segja að krakkarnir sem fari í þann skóla séu vel stæðir og eigi framtíðina fyrir sér.

Rich-what? Richmond!

Ford vs Ferrari (2019)

Einkunn á IMDB: 8.1

Aðalhlutverk: Matt Damon og Christian Bale

Íþrótt: Kappakstur 

Myndin er það ný að undirritaður vill segja sem minnst. Stórkostleg mynd byggð á sannsögulegum atburðum þar sem Christian Bale fer enn á ný á kostum ásamt Matt Damon. 

Sama hvort fólk hefur áhuga á bílum eða ekki þá er myndin vel leikin og stórskemmtileg.

Rush (2013)

Einkunn á IMDB: 8.1

Aðalhlutverk: Chris Hemsworth Daniel Brühl og Olivia Wilde

Íþrótt: Formúla 1

Sannsöguleg mynd sem segir frá ótrúlegum sigri James Hunt í Formúlu 1 og hvernig hann fór í kjölfarið alveg af sporinu. Maðurinn sem hann vann var enginn annar en Niki Lauda. Hann varð síðar eini ökuþórinn sem varð meistari með bæði Ferrari og McLaren. 

Hann er af mörgum talinn besti ökuþór Formúlu 1 allra tíma og eftir að hann hætti að keyra þá fór hann að hanna Formúlu 1 bíla.

Léttari íþróttamyndir með kómísku ívafi geta einnig verið stórskemmtilegar. Þá er mælt með þessum hér að neðan.

Bend it Like Beckham (2002)

Mean Machine (2001) 

White Men Can´t Jump (1992)

Semi-Pro (2008)

Dodgeball (2004)

Talladega Nights: The Ballad of Ricky Bobby (2006)

Cool Runnings (1993)

The Athletic setti saman lista yfir 100 bestu íþróttamyndir allra tíma á dögunum og hann má finna Hér.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.