Íkveikja í Fellaskóla

Eldur kviknaði í Fellaskóla í Breiðholti á fimmta tímanum í dag. Í fyrstu var talið um að mikinn eld væri að ræða en svo reyndist ekki. Börn og kennarar voru í skólanum og voru fjórir slökkvibílar sendir á vettvang auk þriggja sjúkrabíla.

Þegar slökkvilið kom á vettvang var búið að rýma skólann.

Samkvæmt upplýsingum frá Slökkviliði höfuðborgarsvæðisins reyndist eldurinn minniháttar. Útlit er fyrir að einhver hafi kveikt eld við kjallarahurð bakatil við skólann. Eldurinn fór í hurðina og mikill reykur barst inn í kjallara hússins. Eldurinn barst þó ekki inn í húsið.

Minniháttar skemmdir urðu vegna eldsins en meira var um reykskemmdir. Slökkviliðsmenn eru nú á staðnum við reykræstingar.