Tugmilljóna tjón þegar bómur féllu

Tugmilljóna tjón varð þegar tvær risastórar bómur af byggingakrönum féllu yfir Háaleitisbrautina, rétt vestan við Landspítalann í Fossvogi í dag. Óhappið var með þeim hætti að tólf hjóla kranabíll var að hífa hífa bómu upp í fastan byggingakrana. Jarðvegurinn undir einum stuðningsfæti kranabílsins gaf sig og hann seig einhverja tugi sentímetra. Það dugði til þess að hann sporðreistist og allt húrraði niður. Það er mikil mildi að ekki skuli hafa orðið manntjón því kranabómurnar tvær féllu beint yfir mikla umferðargötu og innkeyrsluna að Borgarspítalanum. Ökumaður kranabílsins náði að henda sér út þegar bíllinn byrjaði að síga, en eins og sjá má á myndunum vísaði stýrishús hans á endanum til himins og margra tonna bómurnar hrundu þvert yfir Háaleitisbrautina. Síðdegis var unnið að því að hreinsa þarna til.