FME vildi fjölmiðlafólk fyrir dómstóla

Eðlilegra hefði verið að dómstólar fengju að skera úr um hvort fjölmiðlafólk hefði bakað sér refsiábyrgð með því að birta gögn sem varða við bankaleynd, að mati Fjármálaeftirlitsins (FME).

Þetta kom fram í máli Árnýjar J. Guðmundsdóttur, lögfræðings á lánasviði FME, á ráðstefnu um bankaleynd í Háskóla Íslands í gær.

Sérstakur ríkissaksóknari vegna bankahrunsins vísaði í vikunni frá málum sex fjölmiðlamanna sem FME vísaði til hans. Taldi hann bankaleynd ekki eiga við þar sem hún hefði þegar verið rofin þegar einhver afhenti fjölmiðlunum upplýsingarnar. Því hefði ekki verið hægt að saka fjölmiðlamennina um að rjúfa leynd sem þegar hefði verið rofin.

Skilningur FME á lögum um bankaleynd er annar, sagði Árný. Eftirlitið teldi að trúnaðurinn ætti að fylgja gögnunum, sama hver fengi þau í hendur og hvernig. Það hefði einnig verið túlkun einstaklings sem hefði tekið þátt í að skrifa lögin, sem eftirlitið hefði ráðfært sig við.

Heppilegra hefði verið að láta dómstólum eftir að skera úr um þetta álitamál, enda væri þá hægt að fjalla um almannahagsmuni af birtingu slíkra gagna, sem sérstakur ríkissaksóknari hefði ekki gert, sagði Árný.

Björg Thorarensen, forseti lagadeildar Háskóla Íslands, blandaði sér í umræður um málið á ráðstefnunni í gær, og sagðist ekki túlka ákvörðun saksóknarans þannig að fjölmiðlar gætu nú birt hvaða upplýsingar sem er. Persónuverndarsjónarmið ætti enn við. Því yrði fjölmiðlafólk að fara varlega þegar ákveðið væri hvað ætti að birta og hvað ekki.

Ríkir almannahagsmunir yrðu að liggja við til að réttlætanlegt væri að birta trúnaðargögn.

Gylfi Magnússon viðskiptaráðherra sagði það ekki réttu leiðina til að tryggja bankaleynd að kæra fjölmiðlafólk. Fyrirtæki sem hefði eitthvað óeðlilegt að fela ætti ekki að geta skýlt sér bak við bankaleyndina.

Unnið er að breytingum á lögum um fjármálamarkaðinn, bæði hér á landi og innan Evrópusambandsins, sagði Gylfi. Sú vinna væri þegar langt komin.

brjann@frettabladid.is