Íbúar mótmæla framkvæmdum

Að sögn Guðfinnu J. Guðmundsdóttur, lögmanns íbúa á svæðinu hafa íbúar farið fram á stöðvun framkvæmda meðan málið er til meðferðar hjá úrskurðarnefndinni. Íbúar halda því fram að veiting byggingarleyfis brjóti gegn ákvæðum aðalskipulags Reykjavíkur og skipulags- og byggingarlöggjöfinni að því leyti að ekki hafi verið samþykkt deiliskipulag fyrir svæðið. „Einungis er í gildi aðalskipulag, en samkvæmt því er þetta íbúðasvæði," segir Guðfinna. „Íbúar hafa bent á að þó svo að í byggingarleyfisumsókninni sé eingöngu verið að sækja um leyfi fyrir breytingu en ekki aukinni starfsemi þurfi að skoða áhrif hugsanlegrar starfsemi á umhverfið vegna aukinnar umferðar, hávaða eða annars ónæðis af starfseminni á þessu svæði," segir Guðfinna. Hún bendir á að um fjögur hundruð starfsmenn verði í húsinu eftir stækkunina en aðeins sé gert ráð fyrir 176 bílastæðum á lóðinni. „Það er því ljóst að umferðaröngþveiti verður mikið á þessu svæði og bar byggingar- og skipulagsyfirvöldum að finna lausn á þessu ónæði áður en umsóknin var afgreidd. Það var ekki gert," segir Guðfinna.