Varðveitum sátt fjölmiðlanefndar

Ingibjörg Sólrún Gísladóttir, formaður Samfylkingarinnar, spurði forsætisráðherra í upphafi þingfundar í gær hvort til stæði að rjúfa þá sátt sem hún teldi liggja fyrir í fjölmiðlamálinu og lagður hefði verið grunnur að í fjölmiðlanefnd sem skilaði niðurstöðum sínum síðastliðið vor. Tilefni spurningarinnar var andstaða Geirs H. Haarde utan-ríkis-ráðherra og Þorgerðar Katrínar Gunnarsdóttur menntamálaráðherra við þá niðurstöðu nefndarinnar að einn og sami aðili geti átt allt að 25 prósenta hlut í fjölmiðli. Þau hafa bæði lýst því að þetta hlutfall ætti að vera lægra. Halldór Ásgrímsson forsætisráðherra sagði að engin sátt hefði verið rofin. Stjórnmálaflokkar yrðu að hafa svigrúm til að marka sína stefnu eins og landsfundur Sjálfstæðisflokksins hefði gert. „Ég tel að niðurstöður þessarar nefndar séu mjög góðar og hef lýst því yfir áður að ég geng út frá því að áfram verði byggt á starfi þessarar nefndar. Menntamálaráðherra hefur gert það jafnframt. Þannig að ég vænti þess að það starf haldi áfram á þeim grundvelli og við varðveitum þá sátt sem þar hefur verið," sagði Halldór. Stjórnarandstöðuþingmenn kváðust skilja orð forsætisráðherra svo að byggt yrði á þeim grundvelli sem sátt hefði orðið um í nefndinni. Mörður Árnason, þingmaður Samfylkingarinnar, vísaði til andstöðu Davíðs Oddssonar við niðurstöður fjölmiðlaskýrslunnar: „Þá snerust tveir vindhanar í rétta átt. Og þeir voru hæstvirtur utanríkisráðherra Geir H. Haarde, nýorðinn formaður Sjálfstæðisflokksins, og hæstvirtur menntamálaráðherra Þorgerður Katrín Gunnarsdóttir, ráðherra hinnar sögulegu sáttargjörðar. Þá snerust þau 180 gráður vegna þess að ennþá stjórnar Sjálfstæðisflokknum Davíð Oddsson." Þorgerður Katrín Gunnarsdóttir menntamálaráðherra ítrekaði að sér þætti umrætt eignarhlutfall of hátt en allt yrði gert til þess að halda sögulegri sátt í málinu. Sigurður Kári Kristjánsson, þingmaður Sjálfstæðisflokksins, sagði að fjölmiðlanefndin setti ekki lög. Alþingi hefði síðasta orðið.