Þingeyingar ósáttir með svör Steingríms og gengu út

Fulltrúar fjögurra sveitarfélaga í Þingeyjarsýslum gengu í gær út af fundi á fjármálaráðstefnu sveitarfélaga sem nú stendur yfir. Ástæða þess að þeir fóru út úr salnum voru orð Steingríms J. Sigfússonar fjármálaráðherra sem var að svara fyrirspurn um atvinnumál í Þingeyjarsýslum.

Þeir sem gengu út voru fulltrúar Norðurþings, Þingeyjarsveitar, Langanesbyggðar og Skútustaðahrepps.

Guðný Sverrisdóttir oddviti Grýtubakkahrepps hafði spurt Steingrím um efndir á loforðum um atvinnuuppbyggingu í Þingeyjarsýslum. Steingrímur svaraði því til að óraunsætt væri að ætla sér að byggja 360 þúsund tonna álver á svæðinu. Til þess þyrfti að virkja Skjálfandafljót.

Ónefndur sveitarstjórnarmaður sem fréttastofa ræddi við á fundinum lýsti því sem svo að Steingrímur hefði í raun „drullað" yfir Þingeyinga með svari sínu.

Gunnlaugur Stefánsson, forseti bæjarstjórnar Norðurþings, og einn þeirra sem gengu af fundi, sagðist ekki vita hvað Steingrímur ætti við með 360 þúsund tonna álveri. Viljayfirlýsing sem samþykkt hafi verið á sínum tíma geri ráð fyrir 250 þúsund tonna álveri. Þá séu engir að tala um að virkja eigi Skjálfandafljót nema Vinstri grænir. Gunnlaugur segir að þegar hann hafi heyrt fjármálaráðherrann tala á þessum nótum hafi hann ákveðið að ganga út.

Guðrún María Valgeirsdóttir, sveitarstjóri Skútustaðahrepps, sem einnig yfirgaf fundinn, sagði að þau orð, sem fjármálaráðherrann viðhafði, hefðu verið mjög ósanngjörn og ómakleg. Hann hefði með ummælum sínum gengið yfir strikið.