Hafnaði uppboðskröfu

"Endanlegur dómur um hvað muni gerast hefur ekki gengið. Sýslumaður hefur hafnað uppboðskröfunni og mun krafan væntanlega fara fyrir héraðsdóm. Við munum fara alla leið og láta á það reyna hvort uppboðið sé heimilt eða ekki," segir Helgi Sigurðsson, yfirmaður lögfræðideildar KB banka. En sýslumaðurinn í Reykjavík stöðvaði uppboð jarðarinnar Brautarholt á Kjalarnesi þar sem jörðin lúti lögum um óðalsjarðir. Aðspurður um hvort uppboð jarðarinnar sé eini möguleiki KB banka til að fá peninga upp í kröfu bankans segir hann bankann einnig hafa tryggingar í rekstri svínabúsins. Rekstarfélagið Braut sér um rekstur búsins og er KB banki aðaleigendur félagsins. "Við lítum svo á að hægt sé að veðsetja afmarkaða skika óðalsjarðarinnar sem í sjálfu sér eigi ekki að takmarka nýtingarrétt hennar að neinu verulegu leiti. Við höfum hæstaréttardóm fyrir okkur þar sem þetta var talið heimilt." Helgi telur að veðsetningar hafi verið taldar góðar og gildar á sínum tíma annars hefði ekki verið tekið veð í jörðinni. Þá segir hann næsta skref í málinu vera að fá endanlega niðurstöðu um hvort uppboðið sé heimilt eða ekki og sjá þá hvert framhaldið verður. Þórdís Bjarnadóttir, skiptastjóri þrotabús svínabúsins, segist telja að sýslumaður boði til fundar þar sem farið verður yfir óðalsjarðarlögin og kröfurnar verði teknar fyrir. Ef sýslumaður selur ekki jörðina geta kröfueigendur kært til héraðsdóms. Stærstu kröfur í búið eiga KB banki og tollstjóri. Að sögn Atla Más Ingólfssonar, lögfræðings hjá landbúnaðarráðuneytinu, eru til töluvert margar óðalsjarðir en þeim fari fækkandi. Eftir gildistöku nýrra jarðarlaga, 1.júlí síðastliðinn, er óheimilt að stofna óðal. Af óðulum þurfti ekki að borga fullan erfðaskatt heldur gat sá sem fékk óðalið að borga þeim sem áttu tilkall til jarðarinnar helming af fasteignamati hennar. Þannig þurfti ekki að skipta óðalinu upp. Hann segir veðsetningar óðala hafa verið dæmdar ólöglegar í Hæstarétti. Fari málið með Brautarholt fyrir dóm gæti gerst að búið yrði ekki talið óðal ef ekki hefur verið farið með það sem slíkt en það verði dómstólar að skera úr um.